KOTA SAMARAHAN: Jaku Iban enda deka lenyau ngapa lalu deka seruran idup 100 taun ti deka datai.

Direktor Palan Matih Pengajar (IPG) Kampus Rajang Dr. Lambat Lindong nyemetak madahka Jaku Iban tu deka seruran dikena dataika jemah.

“Kebuah pia laban bansa bukai diatu mega berengkah angkun sereta lanchat agi berandau ngena Jaku Iban.

“Enti sema jaku semina nyadika batang jaku komuniti Iban aja, nyangka tau diperagam kitai tau lenyau dudi hari,” ku iya nerang.

Lambat mansutka jaku tu lebuh dirandau pemberita pengudah tembu Ripin Seminar Dayak Chair Unimas bejuraika Jaku Iban: Pemansang enggau Pemar Ditapi Dudi Hari diatur di Fakulti Sains Sosial enggau Kemanusiaan (FSSH) Unimas ditu, kemari.

Jaku Iban tu mega ku iya ulih dikerembai enggau diangkat nengah macham chara nitihka pematut enggau lebas pengawa.

“Tu nyengkaum dikerembai nengah mayuh bengkah institusyen baka sekula, palan pelajar tinggi enggau palan matih pengajar.

“Enda tinggal mega surat kabar, media rama bup enggau dunya pemerindang ti nengkebang leka lagu ngena Jaku Iban, alai kitai ngetanka jaku asal bansa kitai empu,” ku iya nambah.

Licha nya diatur kedua kali raban Dayak Chair Unimas enggau tuju berandauka pekara ti meri penanggul ngagai komuniti Dayak di Sarawak.

Dayak Chair Unimas mega bisi bejalaika pansik enggau aktiviti bekaul enggau pekara tu lalu nguji besaup mutarka penanggul ti ditapi komuniti Dayak.

NYUAKA TEPA… Ketuai Dayak Chair Unimas Dr Spencer Empading Sanggin (kanan) nyuaka tepa ngagai Lambat (tengah).