KOTA SAMARAHAN: Pengelandik ngena Jaku Iban ukai semina dipeda ba setipikit aja tang patut diayan nengah ulah angkunka jaku nya.

Direktor Palan Matih Pengajar (IPG) Kampus Rajang Dr. Lambat Lindong madahka kitai enda tau ngumbai sida ti nadai setipikit enda ulih tauka nadai penau ngajar Jaku Iban.

“Sebedau orang berengkah belajarka Jaku Iban ba Universiti Pendidikan Sultan Idris (UPSI) tauka IPG, tebal agi sida ti dipadu mangku pengawa nyenggala bisi setipikit ngajar Jaku Iban.

“Lalu sida ti ngarang bup teks tu endang bisi peneleba enggau penau ngajar Jaku Iban,” ku iya.

Lambat mansutka penemu tu lebuh nyaut tanya siku ari penyereta licha ti bejuraika penyampau tubuh pengajar ti nyenggala bisi setipikit ngajar Jaku Iban ba sekula primari pengudah tembu Ripin Seminar Dayak Chair Unimas bejuraika Jaku Iban: Pemansang enggau Pemar Ditapi Dudi Hari diatur di Fakulti Sains Sosial enggau Kemanusiaan (FSSH) Unimas ditu, kemari.

SANDING PENEMU… Lambat lebuh meri licha bekaul enggau Pemansang enggau Pemar Dudi Hari ditapi Jaku Iban di FSSH ditu, kemari.

Nangkan nya, sebagi ari pemar ditapi raban bansa Iban ba pengawa ngetanka Jaku Iban nitihka singkang pemansang dunya kemaya hari laban nadai sebarang opis ngena jaku tu nyadi batang jaku maya ngatur pengawa.

“Taja jaku tu udah diajar ba sekula tang nadai opis bukai di Malaysia ngena iya nyadi batang jaku kelimpah ari pengajar enggau nembiak kelas Jaku Iban.

“Nyauka semua opis nadai ngira opis perintah enggau peribit ngena Jaku Melayu enggau English ngujungka jaku kitai napi pemar deka mansang,” ku iya nerang.

Kelimpah ari nya ku Lambat, genap iku kitai ti bisi ati enggau angkunka Jaku Iban patut bisi bup pasal jaku tu baka Bup Sereba Reti.

“Anang lembau macha bup enggau karang ti udah dikarang ngena Jaku Iban nyengkaum leka main kitai.

“Pending mega program nengah radio laban sida tu orang ditemu bisi pengelandik enggau peleba ngena Jaku Iban,” ku iya.

Lambat mega bisi nibarka jaku ngelalau mensia mayuh kelebih ari nembiak rebak baru angkunka jaku asal sida empu tang enda ngelaungka jaku bukai.

“Laban jaku tu identiti kitai, lenyau jaku bansa kitai mega lenyau kelai munyi ku jaku sempama, dikelala buah ari langgu, dikelala basa ari penyiru, dikelala bansa ari jaku.

“Pia mega anang sepeneka ngena jaku kitai laban bisi sistem jaku sereta muntang agi dipelajar ari jaku bansa bukai,” ku iya ngelalau.