KUCHING: Perais manggai RM100,000 nganti bala pemenang Kuching Marathon 2019 renggat keenam deka diatur 18 Ogos tu.

Menteri Dagang Temuai, Seni, Main Asal enggau Lumba, Datuk Abdul Karim Rahman Hamzah madahka pelanda renggat keenam tu nyendia perais manah dikena matak mayuh agi penyereta.

“Taun nyin tadi, kitai udah nyendiaka perais penyampau RM80,000 lalu taun tu nambah manggai RM100,000.

“Semua penyereta nembuka pelanda mega deka diberi midul ti diukir khas mandangka gaya idup di Kuching kelimpah diberi baju T khas seraya bala pemenang kategori 42km enggau 21km deka nerima baju khas,” ku Karim rambau aum pemberita ditu, apin lama ke udah.

Ku Karim naka diatu penyampau tubuh bala penyereta ti udah rejista manggai 9,000 lalu deka nambah laban hari nyadi pekit agi panjai.

PERAIS NGANTI KITA… Datuk Abdul Karim Rahman Hamzah (tengah) sereta staf ti bekaul dalam Kuching Marathon mandangka sekeda baju T enggau midul.

“Kitai melaba penyampau sida tu ngenyit nambah ngagai 13,000 kandang sebulan sebedau hari nyadi.

“Bala penyereta deka berebut rejista maya hari bulan majak semak.”

Ku iya, penyereta luar udah rejista diatu manggai 10 peratus ari penyampau tubuh semua penyereta.

“Penyereta ari menua Brunei bisi 293, China (78), Indonesia(224), Kenya (19), New Zealand, Singapore enggau menua bukai.

“Lalu penyereta ari Sabah bisi 633, Johor (165), Selangor (464), enggau Wilayah Persekutuan Kuala Lumpur (566),” iya nerang silik.

Kelimpah ari nya ku iya, haribulan dikena lima taun ke udah kenyau ari pelanda tu diatur udah ditukar ngagai minggu ketiga, bulan Ogos.

“Ngelama tu, pelanda diatur ba hari minggu iya nya minggu kedua kena bulan Ogos.

“Pengatur udah setuju ngelanjar Kuching Marathon tu ba minggu ketiga bulan Ogos laban hari minggu kedua Ogos tu beserak enggau Hari Raya Aidiladha,” terang iya.

Pia mega ku iya, semina Kuching Marathon tu aja marathon di dunya diaku Gerempung Marathon Entarabansa (AIM).

“Pengudah diaku AIM, marathon tu udah bisi penuduk iya empu sama baka Tokyo Marathon enggau Boston Marathon.

“Ba Malaysia, semina bisi empat marathon aja ti nerima pemendar iya nya Sabah Borneo Marathon, Kuching Marathon, Standard Chartered Kuala Lumpur, enggau Pinang Bridge Marathon.

“Kitai patut berasai temegah laban di Sarawak semina marathon tu nerima pemendar ari AIM,” ku Karim nandu.

Kuching marathon bisi empat kategori iya nya marathon penuh, 42km, setengah marathon, 21km, 10km enggau kategori pelanda pemerindang iya nya 5km.

Karim mega muji piak pengatur beratka pekara pengelantang penyereta ke alai sida ngaul kerejasama 18 buah surau sepanjai trak pelanda ungkup sida ti deka besembiang.

Mensia mayuh ditesau rejista nama diri enggau nyereta pelanda tu ngambi ngerichahka agi aktiviti marathon deka meleka ari Plaza Merdeka.

Sida dipinta rejista nengah website www.marathonkuching.com.

Sama datai Sektretari Mendam Opis Menteri Dagang Temuai, Seni, Main Asal, Nembiak enggau Lumba, Hii Chang Kee, Datuk Bandar Dewan Bahasa Kuching Utara (DBKU), Datuk Abang Abdul Wahap Abang Julai, Ketuai Pemesai Eksekutif Kaunsil Lumba Sarawak (PSS) Dr Ong Kong Swee enggau Presiden Gerempung Marathon Bagi Menua Kuching Wong Chen Yi.