Miss Plus Sarawak 2019

MIRI: Pemintar bejaku enggau bepenau bemacham bansa pengawa entara ulah patut dikembuan pemenggi gelar Miss Plus Sarawak 2019 kelimpah meda pemesai langkar tubuh sereta pemajik gamal.

Miss Plus Sarawak 2019, Crystal Lulong Linang, 24 taun, madahka pemajik ukai semina dipeda ari gaya pendiau aja tang mega pemanah ulah kitai siku-siku.

“Tu ukai pekit pemajik gamal keterubah disereta aku laban kala bepekit di Semenanjung Malaysia sebedau mulaika diri ke Sarawak ujung taun nyin tadi.

“Taja suah udah nyereta pekit tang apin kala ninga pekit baka tu diatur ti diungkup ngagai indu besai langkar tubuh di Sarawak,” ku iya lebuh dirandau Suara Sarawak, apin lama ke udah.

Nya kebuah iya mutuska penemu diri nyereta pekit pemajik gamal ti bebida ari atur pekit ti sama ngelama tu.

PENGERING SEMENGAT… Crystal begambar enggau diri sebilik sereta bala bakih iya.

“Besai juluk ati deka nyadi Sebagi ari raban keterubah ngerebut peluang enggau gelar ti ngangkatka penau enggau pemajik gamal sida ti besai langkar tubuh.

“Tau dikumbai kitai pekit ti nyelai sereta jarang diatur ba dunya tu ti ukai dipeda ari pemintar runding,” ku Crystal.

Tambah mega ku iya bisi sukung manah amat ari apai indai enggau bala bakih sepanjai ngaul diri ba pekit baka tu.

“Ari sukung tegut sida tu ngasuh aku ransing agi sereta enda mudah mantul ngapa bepekit laban rejeki siku-siku enda sama.

“Taja mayuh kami sebilik enggau bala bakih enda ulih datai meri sukung ba renggat kepenudi tang jaku peransang sida semampai dikeingat aku nyadika pengering semengat,” ku iya berasai sinu.

DARA BAJIK… Crystal dipasukka jumpang pengudah dipadu menggi gelar Miss Plus Sarawak 2019 keterubah.

Crystal mega bisi bekunsika orang ti nyadi peransang ngelama tu endang bepun ari apai iya empu.

“Iya ukai semina nyadi apai aja tang mega bakih aku, bujang berani ngagai kami sebilik.

“Ba aku empu, apai nyadi chunto enggau teladan pemadu manah ti seruran ngajar kami diri menyadi ngemeratka pelajar ba pengidup,” ku iya ti gawa nyadi pengajar Jaku English di sebuah sekula primari.

Crystal pechayaka rambai jaku ‘beauty with brain’ tauka enda dikalih ngagai Jaku Iban ngemai reti bajik enggau pintar runding, ke alai kitai ti belajar tu endang nyadi pengawa seumur idup.

“Tu ngasuh aku seruran naka ulih nyadi mensia menyana agi, ninting hari ngangkat enggau nyeridi ulah diri empu.

“Enti bisi peluang dikena ngangkatka penau enggau pegari nama, aku ukai semina deka ngenegapka diri empu aja tang ngemai orang bukai kelebih agi rebak biak sama angkat,” ku Crystal madah nyemetak.

Nya kebuah iya deka ngingatka rebak biak pasal pemajik tu ke amat pasal baka ni kitai ngemai diri ba dunya ti mayuh pemar tu.

“Intu meruan, anang nempayaka diri lalu anang sesekali nguji ngereja ulah enda menuku ti ulih ngerusak pengidup dudi hari.

“Kitai idup tu ukai nengali tang patut nempa kaul bebaik enggau orang bukai sereta angkunka ulah bebasaka pangan diri nipakka gaya idup pupu bansa,” ku iya ngajar.

Miss Plus Sarawak 2019 tu diatur Sociolytic Sdn. Bhd. enggau kerejasama Serakup Dayak Miri (Dam) ti nyadi pengatur begulai lalu disukung Majlis Bandaraya Miri (MBM).

REJEKI… Crystal mujur ngemai pulai perais mata duit RM1,500, selampai, jumpang, trofi enggau segupung bungai.