KUCHING: Perintah Nengeri deka nentuka penanggul suntuk ai di Kampung Sebakau, Daro enggau genturung pendiau bukai ulih diputar ambis laun pengujung taun 2020.

Ku Menteri Utiliti, Datuk Seri Stephen Rundi Utom rambau aum media, isu tu deka diputar lengkas lalu perintah benung dalam proses mutarka penanggul suntuk ai di sitak genturung pendiau nya.

“Kami udah nerima sekeda kompelen pasal isu tu kelebih agi di Pulai Bruit lalu sida kebendar udah nerima pemansut ai ari Sarikei 8.5 juta liter sehari.

“Tang kami udah nyendiaka dua projek ungkup Pulau Bruit ti deka dipejalai dalam timpuh dua taun lalu diperambu tembu pengujung taun 2020.

“Isu tu diperambu deka diputar ba pengujung taun 2020 lalu genturung pendiau tu deka nerima 18 juta liter ai,” ku Rundi rambau aum media, kemari.

Rundi madah, Perintah Nengeri udah bejalaika projek besai ungkup bekal ai di Tanjung Manis.

“Penyampau 8 pakej ai disediaka dalam projek tu mujur dipejalai tang semina ai ti ngena sistem penapis sungai (RBF) ti agi tejanggal.

“Sistem tu enda bejalai enggau lanchar nitihka peminta iya nya semina ngasilka 125 juta liter ai sehari.

Penyampau ti diasilka semina 51 juta liter ai sehari.

“Nambahka, ai ti diasilka ngundan ammonia ke tinggi,” ku iya seraya madah penanggul tu ngujungka sekeda projek bukai mega tejanggal.

Ku Rundi nambah, Perintah Nengeri deka bejalaika inisiatif nyendiaka dua agi pakej ai ngambi disambung ngagai Pulau Bruit.

“Pakej tu ditambah dikena nambahka pemayuh ai ari Sarikei dikena mutarka penanggul suntuk ai di Pulau Bruit.
“Kami deka penanggul tu ulih diputar jampat ambis laun ba pengujung taun 2020 taja inisiatif tu enda ulih dipejalai jampat ,”ku Rundi nerang.

Rundi ngelalau bala ti kompelen tauka pemeri infomasyen ngambi ngenukuka pekara bekaul isu tu.

Kelimpah ari nya ku iya, Pekara tu deka ngemuntangka semua piak chakah bejalaika pengawa nagang penanggul suntuk ai ba genturung pendiau nya