“Aku ninting taun nyereta festival tu lalu aku ngarapka muzik Iban ukai semina dipandang ngagai rayat Sarawak aja tang ngagai tikas dunya ngelala muzik bansa kitai.”

KUCHING: Leez Zwita ngarapka industri muzik Iban ulih dibai ngambi bagi ba ‘Festival Muzik Hutan Hujan Dunia’ (RWMF) ba awak ti deka datai.

Penanyi tebilang Iban enggau lagu Gerah Mata Undang ti udah mujur nerima 1.1 juta orang ti meda ba ‘youtube’ dua taun ti udah nya ngarapka jemah ila muzik Iban deka dipantaika ba RWMF.

“Aku ninting taun nyereta festival tu lalu aku ngarapka muzik Iban ukai semina dipandang ngagai rayat Sarawak aja tang ngagai tikas dunya ngelala muzik bansa kitai.

“Pia mega, kitai ulih belajar lalu ngaga muzik menua luar ngagai industri muzik Iban,” ku iya.

Leez Zwita

Iya madah munyi nya lebuh ditanya pengari Suara Sarawak di RWMF 2019 ba Kampung Budaya Sarawak kemari.

Leez Zwita ti mega kala nerima anugerah Kulit Album Pemadu Manah ba Anugerah Muzik Dayak 2016 ba baruh pegai Masan Kaya datai berami enggau meda festival madah chukup gaga sereta gagit meda pemerindang muzik ti datai ari mayuh bengkah menua.

“Taun tu rami agi ari taun ti bukai enggau aku amat gagit ati meda pemerindang sida.

“Pupu bansa ari selampur dunya begempuru ditu meda pemerindang ari mayuh macham muzik enggau tanda,” ku iya nandu.

Kelimpah ari nya, Leez Zwita madah iya deka ngeluarka album baru ba taun 2020.

“Aku deka ngeluarka album lagu baru ba 2020, tang siti ari lagu ba album nya udah bisi pansut ba media rama ‘youtube’,” ku iya.

Lagu iya ti udah pansut ba ‘youtube’ kenyau tiga bulan ti lalu iya nya ‘Milih Lelaki’ udah nyapai 35,000 orang ti meda.