“…ngarapka kerejasama entara sida deka meri pemanah ngagai Sarawak lalu danji ti digaga ulih nyadi nyata pasal mutarka isu nyeleti sekula repuk.”

KUCHING: Isu sentang nyeleti sekula repuk ti dipelaba Menteri Pelajar, Sains enggau Pansik Teknologi Datuk Sri Michael Manyin Jawong deka mujur dipejalai pengudah baum begulai Opis Menteri Wang dalam minggu tu nerima balas ti positif ari bala pengajar.

Rosita Kunyo, 34 taun pengajar ba Sekula Sekondari (SMK) Simunjan No 1 madah, arapka pengawa nyeleti sekula repuk tu dipejalai enggau lengkas.

“Aku ngarapka pekara tu amat sereta enda ngasaka ati laban kerejasama entara Perintah Besai enggau Perintah Nengeri endang patut ngambika meri pemanah ngagai nembiak sekula.

“Pia mega, ngarapka kerejasama entara sida deka meri pemanah ngagai Sarawak lalu danji ti digaga ulih nyadi nyata pasal mutarka isu nyeleti sekula repuk,” ku iya.

Rosita Kunyo

Rosita bejaku munyi nya lebuh dirandau Suara Sarawak, ensana.

Kelimpah nya, Nicheal May Pinoh, 35 taun pengajar ba Sekula Primari China (SJKC) Chung Hua Tudan, Miri ngarapka isu tu deka diatur enggau meruan entara Perintah Besai enggau Perintah Sarawak laban menua Malaysia lama udah Merdeka.

“Endang udah tanggungpengawa perintah patut bekerejasama mutar sereta ngelengkaska isu sekula repuk enggau perengka guna sekula di Sarawak tu.

“Aku ngarapka agih belanja ti diberi jampat datai ngagai sekula ti repuk lalu ulih tembu nitihka timpuh ti udah ditetapka,” ku iya.

Pia mega Nicheal ngarapka sekula repuk ti diseruri ila deka bekualiti awakka bala nembiak nyamai belajar sereta ngerapatka takah bala nembiak sekula menua pesisir sebaka enggau bala nembiak ti sekula ba mengeri.

Nicheal May Pinoh

Nangkan nya, Mary Marianne Norbat, 31 taun ngajar ba SMK Lundu mega ngarapka isu tu dikemujur enggau lengkas awakka bala nembiak sekula jampat agi bulih penyamai lebuh belajar.

“Aku gaga sereta ngarapka pekara tu jampat diatur awakka bala nembiak ti sekula ulih belajar enggau meruan.

“Ukai semina bala pengajar, apai indai sereta mensia mayuh dipelaba aku deka meda isu sekula repuk tu dikemujur enggau lengkas laban nembiak ba Sarawak endang lama udah nganti sekula sida diseruri,” ku iya.

Nambah nya, Tan Boon Kim, 52 taun ngajar ba SJKC Chung Hua No 2 Kuching madah aum dikena mutarka isu nyeleti sekula repuk tu endang manah.

“Kira perintah endang ngambi isu nyeleti sekula repuk tu enggau serius lalu aku ngarapka penanggul ngemanahka sekula repuk tu deka diputarka enda lama agi.

“Menua kitai udah lama Merdeka lalu ba runding aku mayuh amai jasa orang menua pesisir dalam pemansang menua, tambah mega kitai endang bisi agih belanja nya,” ku iya.

Ensanus, Michael Manyin madah isu pasal nyeleti sekula repuk di Sarawak deka mujur pengudah baum sida dipejalai ti dipelaba iya ba minggu ti deka datai tu ila.

Diatu, iya madah benung nganti aum nya dipejalai lalu iya ngarapka isu nyeleti sekula repuk tu enda nyadi pekara politik laban nembiak sekula deka napi pemerinsa ketegal nya.

 

Mary Marianne Norbat

 

Tan Boon Kim