“Enti ulih kitai deka meda semua Indu Opis JKDM di selampur Sarawak tu diiring anak Sarawak empu.”

KUCHING: Sarawak patut temegah laban orang ke dipadu nyadi Direktor Opis Kastam Diraja Malaysia (JKDM) di menua tu endang peranak nengeri tu empu, ku Speaker Dun Datuk Amar Mohamad Asfia Awang Nassar.

Mohamad Asfia madah iya empu endang temegah meda Datuk Sharifah Halimah Tuanku Taha dichiri nyadi Direktor JKDM Sarawak ti mega endang anak Sarawak ti tulin.

“Pengawa nyiri anak Sarawak nyadi Direktor JKDM di menua tu endang terus deka nanggam pemanah kaul bala pemesai enggau pengereja pengawa di dalam JKDM empu.

“Enti ulih kitai deka meda semua Indu Opis JKDM di selampur Sarawak tu diiring anak Sarawak empu,” ku iya.

NYAMAI LAUK…Datuk Amar Mohamad Asfia Awang Nassar (empat kiba) nyepi pemakai ti dinah Indu Opis JKDM selampur Sarawak ba Pengerami Gawai Raya JKDM Sarawak di Kompleks Dun Lama ditu, kemari.

Iya bejaku munyi nya lebuh nyadi temuai ti dipebasa ba Pengerami Gawai Raya JKDM Sarawak di Kompleks Dun Lama ditu, kemari.

Kelimpah ari nya, iya meri pengaga ati ngagai opis JKDM lebuh bendar gawa nyaga menua maya bulan ‘puasa’ tu tadi.

“Kitai mega patut gaga laban menua kitai begempung sereta beserakup, lalu aku rindu meda bala kaban belayan datai ari ulu enggau ili sama sampal datai ngintu pengerami tu.

“Pia mega aku ngarapka menua kitai terus dikemata petara ngambika nuju pemansang enggau pengelikun sereta segulai sejalai,” ku iya.

Nangkan nya, iya mega ngarapka lebuh ngintu pengerami semua piak muai ke tisi pekara politik dulu laban dalam pengerami semua rayat patut besatu sereta begulai sama.

Pengudah bejaku, iya lalu diabai Direktor JKDM Sarawak Sharifah Halimah bejalai meda 13 buah palan endur ngambi pemakai ti diarika Indu Opis JKDM selampur Sarawak.

Sama bisi datai Menteri Muda Pemansang Dagang Mit enggau Jelan Pemesai (PKS) Datuk Mohd Naroden Majais, Datuk Bandar Dewan Bandaraya Kuching Utara (DBKU) Datuk Abang Abdul Wahap Abang Julai sereta bala ti bukai.