KUCHING: Gerempung nembiak di Sarawak engka enda disengkaum dalam ubah rang undang-undang ngemaruhka tikas umur nembiak ari 40 ngagai 30 taun.

Menteri Nembiak enggau Lumba Syed Saddiq Syed Abdul Rahman madah iya bisi berandau enggau Kepala Menteri Sarawak Datuk Patinggi Abang Johari Tun Openg bekaul pekara nya lalu udah diterang enggau silik.

“Pekara nya bisi dirandau tadi lalu aku udah nerang enggau silik ngagai iya (Abang Johari) laban ubah rang undang-undang ti digaga nya dituju ngagai sida ti ngerejister ba Pengerejister Gerempung Nembiak (ROY).

“Pekara ti dipadah Perintah Nengeri sebedau tu bekaul enggau belanja sereta reta sida endang diempu perintah nengeri, enda sebaka laban ukai dalam kuasa Perintah Besai, tang sida ti ngerejister ba baruh ROY deka diteruska,” ku iya.

Syed Saddiq bejaku munyi nya maya ditanya pemberita lebuh nemuai meri basa ngagai Kepala Menteri Sarawak Datuk Patinggi Abang Johari Tun Openg ba Opis Kepala Menteri di Wisma Bapa Malaysia ditu, kemari.

BERANDAU…Syed Saddiq (dua kiba) betemu enggau Datuk Patinggi Abang Johari (tiga kanan) Tun Openg ba Opis Kepala Menteri di Wisma Bapa Malaysia ditu, kemari. -Gambar NADIM BOKHARI)

Ku iya, tu laban gerempung nembiak di Sarawak tu direjister ba baruh Opis Pengerejister Gerempung (ROS) lalu Rang Undang-Undang (RUU) ‘Akta Pertubuhan Belia dan Pembangunan Belia’ (Pindaan) 2019 (Akta 668) semina ngagai gerempung ti ngerejister ba baruh ROY.

Taja pia, Syed Saddiq madah opis menteri iya deka tetap bejalaika kerejasama rat enggau Perintah Sarawak dalam mantu bala nembiak ti baruh umur 30 taun pengudah ubah undang-undang nya dipejalai Disember 2021 ila.

Nangkan nya, Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah gerempung nembiak pemadu mayuh di Sarawak iya nya Gerempung Nembiak Bansa Sarawak (Saberkas) direjister ba ROS ke alai sida deka nentu kediri tikas umur ti patut lebih kurang 40 taun gerempung nya.

“Kami mega bisi program mantu sida ba B40 baka program dagang, betanam betupi enggau ke bukai.

“Nyadi enti tikas umur tu dikemaruhka agi, nya deka ngachau pengawa ti dikereja ngelama tu, nya alai kitai deka meda dulu pangka enggau pekara bukai sentang nya,” ku iya.

Kelimpah ari nya, Karim madah tikas umur nya ukai pekara besai tang iya endang deka ngemeratka agi kerejasama rat entara Perintah Besai enggau Perintah Sarawak dalam ngemansangka bala nembiak.
Apin lama dalam Aum Kaban Parlimen tu tadi Syed Saddiq madah pasal ubah rang undang-undang tu ti nerima mayuh buah runding ari 17 iku Kaban Parlimen bukai.

Entara siti kebuah ti banggat ngirauka ati sida iya nya nangika hak nembiak ti baru muka dagang bisi penanggul ngulihka bantu belanja ari perintah.
-abis-