KUCHING: Rinduka pengawa nempa produk kraf jari endang enda pulaika pengerugi laban asil pengawa nya tau meri jereki sereta nyadi pun penatai pemisi.

Festival Muzik Hutan Hujan Dunia(RWMF) 2019 meri penguntung ngagai pedagang asil pengelandik jari sepanjai tiga hari berunggu festival nya diatur.

Martina Benedict Paul, 44 asal ari Kampung Bobak, siku pedagang manik di Kampung Budaya madah, asil ari pengelandik manik ti digaga iya meri untung besai taun tu enti dibanding taun ke udah.

“Temuai luar ti ngelawa endur tu rindu agi milih asil pengelandik jari asal ari kayu enggau tulang jelu.

“Taja pia, kami enda ulih nitihka peminta penguna laban isu perintah nyaga pengelikun jelu enggau napi pemar ngulihka prengka asal,” ku iya rambau dirandau Suara Sarawak di Kampung Budaya.

LANDIK NUSUK MANIK… Martina Benedict Paul, siku orang ti landik nempa enggau nyual manik lebih 30 taun ke udah mujur nyungkak penatai pemisi diri rambau Pengerami Muzik Kampung Ujan Dunya 2019.-Gambar Ghazali Bujang

Iya mega merambu ngagai Perintah Nengeri ngambika rega tikit tama ngagai RMWF ke deka datai bisi bida entara temuai luar enggau peranak menua tu.

“Kami meda rega tikit tu mar ungkup temuai menua tu lalu temuai luar nyangka nadai penanggul bebelika tikit RMWF.

“Temuai menua tu rindu ag bebelika asil pengelandik jari enti dibanding temuai luar nitihka peneleba aku nyadi siku pedagang asil pengelandik jari,” ku Martina nambah.

Nambahka nya ku Bawie Ngok, 40 ari raban bansa Penan asal ari Long Lilim, Baram madah asil ungkup taun tu bisi tambah sepemanjai tiga hari berunggu RMWF.

“Asil pengelandik jari kami mujur mansutka asil RM2,500 sepemanjai tiga hari berunggu program tu diatur enti dibanding taun nyin kemari, kami semina mujur ngulih RM1,000 lebih.

“Asil pngelandik jari kami dianyam ngena wi enggau ngena chura asal baka daun sibau ti ngasuh mayu temuai luar meli produk kami,” ku Bawie.

Bawie mega madah, asil pengelandik jari tu udah digaga peranak di Long Lilim nengah bantu Sarawak Energy Berhad.

Sida udah dibantu Sarawak Energy ngelakuka produk asil pengelandik jari ba RMWF 2019.