ENGKELILI: Nasip peranak Rumah Lepang Gerang, Lepan Sayat ditu seruran dikenati mayuh piak.

Menteri Muda Industri enggau Pemeranak Puku Malcom Mussen Lamoh madah, iya nyuaka bantu dikena ngelempungka tating penusah rambau pejalai ngabas sida ti tasah nya.

“Aku nyuaka bantu pemakai enggau ai irup sereta pemeri mata duit penyampau RM10,000.

“Bantu sepenyampau RM30,000 di baruh agih belanja Projek Mit Pemansang Menua Pesisir (MRP) enggau RM260,000 nengah agih belanja projek Program Transformasyen Menua Pesisir (RTP) taun dudi seraya Kelab Rekreasyen Batang Ai (Barec) mega bisi nyuaka bantu penyampau RM500.

“Enda tinggal mega Adun Tamin Christopher Gira bisi mantu RM5,000,” ku Adun Batang Ai ba Facebook iya, kemari.

BETATIKA PENUSAH RAYAT… Malcom nyuaka bantu ngagai orang ti tasah angus, ditu kemari.

Ku iya nambah, rumah panjai nya udah didirika ba taun 2000.

Berebak enggau nya, Pemesai Penyaga Pengelikun Mensia Mayuh (APM) Pelilih Sri Aman, Kapten (PA) Siti Huzaimah Ibrahim lebuh dirandau Suara Sarawak madahka piak sida udah muka Palan Ngenduh Enda Lama (PPS) kena Hari Satu tu tadi di Gerija Saint John berengkah ari pukul 6.30 lemai.

Ku Siti Huzaimah, bisi 137 peranak iya nya lima anak mit, 36 nembiak mit, 70 orang besai tuai enggau 26 orang tuai ti udah regista ba PPS.

“Nitihka penerang, barang pemakai baka pemakai mata disediaka Opis Pengintu Pengelantang Bagi Menua (PKMB) Sri Aman lalu dipanduk sida empu ngena chara beripai.

“Semua bantu ari mayuh piak udah disua ngagai Tuai Rumah Lepang Gerang,” ku Siti nerang.

Nambahka nya ku Siti, orang tasah angus di PPS apin ulih ngereja pengawa bukai laban benung ngemaruka penerang.

Pengari PKBM Sri Aman Hamilie Sahat madah, piak sida udah nyuaka bantu tumu ngagai sida ti tasah baka bantu pemakai enggau ai irup.

Kelimpah ari nya ku Hamilie, PKBM Sri Aman bisi nyendiaka peninduk enggau bekal pemakai ungkup dikena di PPS.

“Lima volunteer mega udah dianjung gawa dia ngambi mantu ngelancharka atur pengawa di PPS.

“Kami nesau peranak besemak nyema bisi gari udah dikena tau diberi ngagai sida tu.

“Mensia mayuh tau betelefon ba lumur 083-321730 tauka nyuaka bantu di Kompleks Penyayang Sri Aman ,” ku Hamilie nambah.

Ngelansa pekara bukai, Kaunsil Pelilih Lubok Antu (MDLA) bejadika kimpin meri bantu gari ungkup peranak Rumah Lepang Gerang.

Nitihka penerang, kimpin tu inisiatif MDLA dikena ngelempungka tating penusah sida nya.

Bantu tau diberi terus ngagai Kaunter Khidmat Pelanggan MDLA tauka nanya ngagai Unit Perpustakaan (083-563173) tauka Unit Pengerai Mensia Mayuh (083-563511).