BAU: Ondu Bung Jagoi tauka Hari Pengerami Besai Bung Jagoi deka diatur kena 20 Julai 2019 berengkah ari 8.00 pagi nyentuk 3.00 lemai.

Pengerami tu diatur Komiti Pemansang Sitak Jagoi (JADC) sereta disukung Kaunsil Pelilih Bau enggau tuju ngintu pengawa lama enggau daya idup komuniti asal dia.

Tuju bukai pengerami tu nyengkaum ngelaku enggau ngangkatka kandang menua nya nyadi pematak ekonomi dagang temuai ungkup temuai menua luar enggau menua tu empu.

Macham rintai aktiviti deka diatur baka Jagoithon Fun Run, nusui ensera, pengawa mandang enggau bemacham main asal dipelaba ngerichahka hari nyadi ila.

Bisi mega sekeda pengawa mandangka main asal enggau ngaga asil pengelandik jari digaga ari utai tumbuh dalam kampung.

RICHAH AGI… Jagoi Kindau ari Kalimantan Barat, Indonesia bisi dikangau nyereta Ondu Bung Jagoi seraya ngayanka pengelandik sida beranyam.

Kelimpah ari nya, bala artis Jagoi Kindau ari Kalimantan Barat, Indonesia mega bisi dikangau bejualka produk ari menua sida.

Bala menyadi bansa Dayak Jagoi Kindau mega deka nunjukka pengelandik sida beranyam baka nganyam bakul wi, tumpa, kasha enggau mayuh ke bukai.

Batang pengerami iya nya Jagoithon Fun Run, urung 2.5km penyauh lalu tambai deka dientak endur sida ti belanda meleka di kaki bukit Bung Jagoi urung pukul 8.30 pagi.

Tuju pelanda tu deka nerenak aktiviti bepengerai sereta matak bala pengusung bejalai matau bukit ti bisi ngelingi sitak Bau kelebih agi Bukit Jagoi.

Bisi tiga kategori disedia ungkup bala penyereta baka Kategori Ungkup Semua (terbuka) bayar RM50, Kategori Sekondari (RM30) enggau Kategori Primari (RM15) siku.

Barang sapa bisi ati nyereta pelanda tu tau rejista nama diri sebedau 18 Julai 2019 tu ngerebut kesemua perais mata duit ungkup ketetiga kategori manggai RM2500.

Penerang enggau tanya silik pasal atur enggau chara mayar tau ngelawa website https://www.facebook.com/BungJagoi/ tauka telefon nuju Direp Duking Nyoheng ba lumur 012-887 1824.