Jematan Batang Lassa

DARO: Projek Jematan Batang Lassa diatu udah berengkah dipejalai ngayanka pengeran Perintah Sarawak ngamatka semaya ungkup pemaik rayat.

Menteri Muda Jalai Pesisir Datuk Julaihi Narawi madah, jematan 2.43km pemanjai ditimpuh tembu kandang 48 bulan ti deka meri pangka besai ngagai rayat kelebih agi sida ti diau ba kandang menua ngelingi Daro.

Ku Julaihi, pejalai projek tu mega nunjukka Perintah Sarawak di baruh pegai GPS seruran chakah nyendiaka perengka guna pemun ungkup pengelantang rayat nyengkaum di kandang menua ulu enggau menua pesisir.

“Projek beungkus RM597.58 juta tu deka nyadi penyambung jalai kandang tebing tasik 896 km pemanjai di Sarawak.

MERI PERATI… Julaihi (dua kiba) lebuh ngabas taba projek Jematan Batang Lassa disempulang Abdullah (tiga kiba) enggau Safiee (kiba).

“Pengudah jematan tembu, rayat deka muntang agi mindah lalu timpuh pejalai pandak enti dibida lebuh ngelayang sungai enggau nepan feri ke diatu,” ku iya lebuh ngetuaika aum nyendiaka diri ungkup pengawa nasih tanah jematan nya di Opis Pelilih Daro, tadi.

Sama datai Menteri Mudah Pekara Korporat Abdullah Haji Saidol, Kaban Kaunsil Nengeri (Adun) Daro Safiee Ahmad, Sapit Residen Bagi Menua Mukah Abdul Halim Abdullah enggau Pemesai Pelilih Daro Bujang Rahman Seli.

Kepala Menteri Datuk Patinggi Abang Johari Tun Openg disadang datai bejadika pengawa kena 21 Ogos tu.

“Kelimpah bejadika Jematan Batang Lassa, kitai mega deka berandauka pengawa nasih tanah projek Jematan Batang Paloh diperambu dipejalai taun baru.

“Berebak enggau nya aku ngarapka semua piak meri kerejasama nentuka pengawa tu lanchar dipejalai,” ku Julaihi.

Abdullah lebuh dirandau madahka pejalai projek jematan tu ngayanka pengari rayat dia naka ulih bejalaika pengawa ti udah mansutka asil.

“Aum tu berandau perambu pengawa nasih tanah ungkup dua projek jematan ti deka nyambung Pulau Bruit ngagai Daro (Batang Lassa) enggau Serdeng (Batang Paloh).

“Ungkus ngaga dua buah jematan tu urung RM900 juta lalu projek tu dipelanja Perintah Sarawak.

“Dua kunteriktor dipilih nengah tinda tebuka mujur nembuka pengawa nyendiaka taba kenyau ari dua bulan ke udah,” ku Adun Semop nya.

Julaihi disempulang Abdullah enggau Safiee ngabas taba projek urung 4km penyauh ari Pasar Daro pengudah tembu baum.