KUCHING: Sarawak nyadi tuai rumah ngintu pengerami Hari Malaysia, 16 September ti deka datai.

Sapit Kepala Menteri Datuk Amar Awang Tengah Ali Hasan madahka Sarawak chukup temegah laban diangkat nyadi tuai pengerami ngintu hari besai nya.

“Tu sebagi ari hari besai ti ulih ngangatka semengat talukka menua enggau angkunka bansa kelebih agi rayat di menua tu.

“Aku ngarapka peluang diberi tu ulih nerenak semengat beserakup enggau kerejasama rat entara pupu bansa,” ku iya madah nyemetak.

Awang Tengah mansutka jaku nya ba aum pemberita pengudah nerima penemuai meri basa ari Sapit Menteri Komunikasyen enggau Multimedia Malaysia, Eddin Syazlee Shith di Wisma Sumber Alam ditu sehari tu.

HARI MALAYSIA 2019… Awang Tengah, Eddin Syazlee Shith (dua kiba), Datuk Mohd Naroden Majais (tiga kanan), Datuk Jerip Susil (dua kanan) sereta pengari bukai sepenemu ngintu Hari Malaysia 2019 di Sarawak.

Nangkan nya ku iya, pengerami deka diatur di Padang Merdeka ditu lalu sida setuju numbuhka sebengkah komiti begulai enggau perintah besai ngatur pengerami nya.

“Perintah Besai deka bekerejasama enggau Perintah Sarawak nengah opis menteri kami.

“Kabinet Perintah Sarawak udah nyiri aku nyadi chairman komiti begulai ngarika Sarawak lalu disaup empat menteri muda,” ku iya ti mega nyadi Menteri Industri enggau Pemansang Pengawa sereta Menteri Kedua Pemansang Nengeri enggau Pengeraja Asal.

Empat menteri muda dipadu gawa Menteri Muda Pemansang Dagang Mit enggau Jelan Pemesai (PKS) Datuk Mohd Naroden Majais, Menteri Muda Perengka Pengangkut Datuk Jerip Susil, Menteri Muda ba Opis Kepala Menteri (Undang-Undang Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali, enggau Menteri Muda Pemansang Tanah Adat Datuk Roland Sagah.

Kelimpah ari nya, Awang Tengah madahka sida udah besetuju numbuhka komiti kereja entara Perintah Besai enggau Perintah Sarawak lalu sida meri sukung nengah bantu nentuka pengerami lanchar sereta nyapai juluk.

Berebak enggau nya Sapit Menteri Komunikasyen enggau Multimedia Malaysia, Eddin Syazlee Shith madahka Perintah Besai nengah opis menteri iya beterima kasih ngagai Perintah Sarawak laban sanggup merambu sereta nyendiaka komiti begulai ngintu pengerami Hari Malaysia.

“Aku pechaya ari pengeran Perintah Sarawak, pengerami tu deka ngemai kenang chukup manis sereta nyadika pengingat rayat Sarawak.

“Rambai jaku Malaysia Bersih nipakka peminta enggau pengandal rayat sereta perintah nerenak ulah ti menua sereta nyeliahka diri ari penyalah makai suap,” ku iya madah nyemetak.