KUCHING: Atlit para nasional ari Sarawak, Bonnie Bunyau Gustin, enda disadang ulih ngalahka pemekit ti senior agi pengudah bulih midul emas kedua ba Kategori Lelaki 65kg (ke atas) Pekit Dunya Para Powerlifting di Nur-Sultan, Kazakhstan, kemari.

Atlit beumur 19 taun ari Sarawak kandang beberapa hari ke udah bulih midul emas keterubah ba Kategori Lelaki Baruh 65kg.

Iya berengkah enggau berat 185kg, dientudi 197kg enggau 207kg lebuh kedua kali nguji lalu nguji baru ngambika menggi gelar senior keterubah iya ba pekit diatur ba Astana Congress Center.

Pemujur tu mega ngemai Bonnie teulihka penuduk bepekit ba Lumba Paralimpik Tokyo 2020.

“Aku berasai gaga amat lalu enda ngadang diri ulih menang midul emas ditu laban beratika bala pemekit ti kering ba kategori disereta.

TEMEGAH… Bonnie Bunyau Gustin, atlit para nasional ari Sarawak

“Taja pia aku bisi pengandal ba pengeransing enggau pengepuh sereta disiplin diri empu lebuh belatih lalu pemenang besai aku,” ku iya temegah.

Iya mansutka jaku tu ba website Komiti Paralimpik Entarabansa (IPC), https://www.paralympic.org/powerlifting.

Kelimpah ari nya, Hocine Bettir ari Algeria enggau atlit angkat berat ari Iran, Amir Jafari Arangeh bela mujur bulih midul pirak enggau engkeraju pengudah mujur ngangkatka 194kg enggau 193kg.

Pemenang midul emas Paralimpik ketiga kali, Liu Lei ari China bulih penuduk keempat pengudah ngangkat 190kg seraya champion Paralimpik, Paul Kehinde ti megai rikod dunya lumba nya puntan nembuka penuduk podium pengudah ketetiga kali iya ngangkat pemerat dikinsil.