LUBOK ANTU: Labuh ai mata sinu lebuh meda gaya pendiau rumah enggau sida ti tasah karam di darat, ku Penyanding Penemu Serakup Dayak Sarawak (Pedas) Sri Aman Insol Harry.

Ngenatika pemerat tating penusah ditapi peranak Rumah Lepang Gerang, Lepan Sayat Bukong di Engkilili ditu ke alai bala kaban Pedas selampur menua bepupuka belanja dikena mantu sida serumah.

“Lebuh dibai bejalai ngabas taba rumah panjai ti angus, semina tinggal dinding enggau tiang aja laban atap abis retung diempa api ba penusah kena Hari Satu, 15 Julai tu tadi.

“Siku ari sida serumah bisi ngemai kami meda bilik enggau keresa lama ti enda empa api baka tawak, tabak, tajau enggau sekeda periuk sereta kereban berapi bukai.

“Abis penyinu meda utai baka tu nyadi ketegal pengilap siku aja ngujungka semua ngasaika pemerinsa taja kitai enda besalahka iya,” ku Insol betatika nasip sida serumah.

KARAM DI DARAT… Atap enggau ramu rumah abis retung diempa api.

Ku Insol, sama bisi besaup enggau Pedas mupu belanja bala kaban ari Dayak Bukit Kelingkang (DBK), Dayak Charity enggau Alumni SMKS92 lalu bantu udah dianjung sida lemai kemari.

“Pengudah nerima berita ngenyit pasal penusah tu, kami sebuat ti nyadi kaban Pedas pemadu semak enggau endur penusah nyadi lalu ngatur randau sereta nyapai pemutus bepupuka belanja.

“Tuju kami semina deka besaup ngelempungka tating penusah enggau ngintu pengelantang sida serumah taja bantu tu enda nyenggala mayuh tang dikearap ulih ngasuh ati sida lantang,” ku Insol.

Bisi lima buah entukar 4WD enggau 15 iku kaban Pedas sereta bala bukai nyempulang pejalai nganjung bantu ngagai Sayat di Bukong, Engkilili ditu.

“Entara utai saup kami baka kereban dikena mandi nyengkaum berus ngeli, sabun enggau ke bukai, pemakai sereta ai irup kelimpah ari bantu mata duit.

ULIH DIKENCHADI… Sekeda ari periuk enggau kali diambi ari taba rumah angus agi ulih dikenchadi.

“Kesemua bantu tu udah disua ngagai Tuai Rumah Lepang Gerang empu ngarika sida serumah ti sama ngambat penatai bala kami.

“Lebuh kami sangkai ba laman, bala nembiak sama betulung ngangkut utai bantu ngagai palan endur ngenduh di gerija dia enggau endur paking kerita ba mua rumah panjai ti angus,” ku Insol ngelansa pejalai sida sebuat.

Sama nganjung bantu Ketuai Pampang Pedas Sri Aman Jackson Bara enggau ex-Kaban Parlimen Lubok Antu Jawah Gerang.

Nitih ku penerang, kangau ngenyit diterima urung pukul 2.07 ngalihari ti madahka 26 pintu bilik Rumah Lepang udah angus lalu 131 iku peranak nadai endur diau.

Sida betubuh 131 tu nyengkaum empat anak mit lelaki, empat anak mit indu, 13 nembiak mit lelaki, 12 nembiak mit indu, orang besai tuai 35 lelaki enggau 36 indu sereta orang tuai 17 lelaki enggau 10 indu.

Raban Nyaga Pengelikun Mensia Mayuh (APM) Sri Aman diketuaika Pemesai Nyaga Pengelikun Mensia Mayuh Pelilih Sri Aman Kapt (PA) Siti Huzaimah Ibrahim disempulang dua tim digerah ngesah endur penusah nyadi.

Sida mujur ngerara kesemua api urung pukul 4.35 lemai lalu nadai penusah bebadi nyawa enggau bakal nyadi rambau penusah nya.

Ku Tuai Rumah Lepang, penusah ditemu bepun ari dapur kayu bilik lumur dua lalu penyampau pengerugi sida serumah agi dipansik.

Naka diatu ku iya, sekeda ari sida serumah ngenduh ba gerija, bisi kedua nirika dampa ba paking kerita lalu ke bukai diau nyemilik kaban belayan besemak.

Iya mega meri besai terima kasih ngagai sida ti enda putus datai nganjung bantu sereta besaup ngelempungka tating penusah sida serumah.

“Terima kasih ke sukung, tulung enggau jaku sampi ari semua, sekalika ari tulang, utai dikena beridup enggau bantu mata duit sereta jaku ke pengering semengat kami.

“Ukai mudah endur kami angkat ngepunka idup baru lalu semua tu deka mar enti nadai saup ari semua piak kelebih agi ngaul pengawa ngentak rumah panjai baru.

“Nya kebuah kami andal amat piak bekaul ulih mendingka sebana enggau nyaup kami berumah baru enggau naka pengelengkas nentuka pengelantang nembiak redak dijaga meruan.

“Semina petara aja ulih malas semua budi bala kita lalu penusah tu nyadika teladan ngagai semua kitai,” ku iya madah nyemetak.

TU AJA TINGGAL… Siku ari peranak Rumah Lepang nunjukka sekeda ari keresa lama ti enda diempa api ba penusah angus rumah Hari Satu nyin tadi.

 

SAUP KAMI… Kaban Pedas diuluka Insol (bediri lima kiba) nyuaka bantu ngagai Tuai Rumah Lepang (bediri, enam kiba) seraya dikemata Jackson Bara (bediri tengah) enggau Ex-MP Lubok Antu, Jawah Gerang (bediri, enam kanan) disempulang bala bukai.