KUCHING: Rebak baru kada ngelala utai dikumbai Bungai Papan laban jarang dibantai enti nadai gawai besai raban bansa Dayak Iban didiri.

Presiden Serakup Ngajat Asal Iban (Ngasi) Sarawak Ajat Sumoh madahka Bungai Papan tu nyauka baka gamal bungai jarau tang enda geletang, lurus sereta lebat agi burai nitihka pengelandik enggau penau jari sida ti ngelalin.

Adap Batang Ai nyebut tu Bulu Papan lalu leka jaku Bungai Papan disebut sida tungaka Batang Rajang – Kajah Kanowit, Katibas enggau Kapit.

Asal Bungai Papan tu ari Kanyau, Emperan di Kalimantan, Indonesia udah nya ditampung sida di Batang Ai.

Enti kelia ku Ajat, Bulu Papan tauka Bungai Papan tu semina dikena maya nitika Gawai Kenyalang enggau Gawai Kelingkang aja tang diatu ulih dikena ba sebarang gawai nitihka penerang ari tuai Gerinang Anak Pinggat peranak Batang Ai.

DAUN ISANG… Ajat nyuyakka sumbuk biru nyadi isang ti sedang pemesai.

Serakup Ngasi Sarawak kala ngena Bungai Papan tu lebuh Pengawa Bejalai Bebala Mayuh Gawai Dayak 2018 ‘Niti Daun’ Renggat Nengeri Sarawak di Waterfront Kuching.

Ku Ajat, baka nengkebang asil pengelandik jari bukai, Bungai Papan mega enda ulih tembu sehari tang begunaka timpuh panjai laban mayuh rurun pengawa.

“Bungai Papan tu digaga ari sumbuk biru lalu dikelalin ngena wi ti diraut alus.

“Ari hari keterubah perambu ngaga bungai papan tu, kami sebuat dulu agi bejalai ke babas ngiga enggau ngambi sumbuk biru enggau batang wi.

NGELALIN… Bila sumbuk biru ti udah rangkai dikelalin ngena wi ba bingkai ti udah dulu digaga.

“Enti ba kampung tuai, sumbuk biru tu deka manah agi belayan laban tumbuh besai, panjai enggau galak agi.

“Tang ketegal nadai kampung tuai ti semak di mengeri tu, kami semina ngambi sumbuk biru ti bisi aja, enda entu galak sereta pandak belayan,” ku Ajat ngelansa.

Wi tu ku Ajat nyadika pemegai enggau ngelalin isang ari sumbuk biru ti udah disuyak nitihka sedang pemesai enggau penebal.

Batang wi deka dijembi dulu ba endur ti tampak panas dataika rangkai sebedau diraut ngena lungga seraya sumbuk biru diengkah ba endur ti teduh enggau lindung mata panas sereta enda kena basah tempias ujan.

“Seminggu udah nya baru datai ba pengawa nyuyakka sumbuk biru, ngaga bila ke alai belayan sumbuk dicharik sedang pemesai.

MANDING…Raban Serakup Ngasi Iban ngemai Bungai Papan lebuh Pengawa Bejalai Bebala Mayuh Gawai Dayak 2018 ‘Niti Daun’ Renggat Nengeri Sarawak di Waterfront Kuching.

“Tembu nyuyak sumbuk biru, kami berengkah ngaga pemegai enggau endur ngelalin bila biru nya tadi, ti digaga segala.

“Bila biru ti udah disuyak deka ditejuka rangkai dulu sebedau dikelalin ngena wi nitihka langkar bingkai ti udah digaga ari batang wi empu.

“Kereja tu dipeda baka rumpas amat tang ke amat mayuh kelikuh sereta begunaka pengepuh tulang ngereja iya dataika tembu,” ku Ajat nusui seraya madahka diri semina nyaup nyuyak tauka melah sumbuk biru nyadi daun isang aja.

Semua penemu engga tunjuk ajar ngaga Bungai Papan tu datai ari aya Sibat Manja, peranak Katibas, Song di Kapit, siku tuai ngajar main asal ba serakup sida.

TEMEGAH… Bungai Papan nyadika pemandang enggau kereban nyelai dibantai Serakup Ngasi Sarawak nyerumba Pengawa Bejalai Bebala Mayuh Gawai Dayak 2018 ‘Niti Daun’ Renggat Nengeri Sarawak di Waterfront Kuching.

Aya Sibat tu siku orang ti chukup landik nengkebang, ngambuh, nyimpai sereta macham bansa main asal bukai baka gendang pampat, betabuh enggau ajat.

Nangkan nya, bila biru ti udah rangkai deka dikelalin nitihka ripih ti diripih enggau meruan ngambika manding enggau manah dipeda mata, ku iya.

“Panjai agi bila biru, badas enggau manding agi iya dipeda. Tembu pengawa ngelalin baru iya tau dikumbai kitai Bungai Papan.

“Enti ngatur bengkel ngaga Bungai Papan tu abis nadai dua tiga renggat baru ulih tembu siti set,” ku Ajat madah nyemetak.

Enti kelia endang bisi penti pemali tang nitihka singkang pemansang jeman kemaya hari ku Ajat, sida ngena chara baru, pengarap baru.

“Keru semengat ngaum sereta chelap sekumbang ngereja pengawa ngaul main asal enggau nengkebang kereban lama kitai Iban.

“Enti bisi sebarang pekara nyadi ti dipeda mata, semua utai tauka burung didinga pending dibai kami dalam sampi minta ibun Tuhan.

“Taja bisi sekeda mekat ngasuh ngintu, tang aku madah enda ibuh laban enti alang-alang enda nyentuk, manah agi anang sekali. Semina leka sembiang ngarapka Tuhan nyangkung pengawa kami ti lurus ati ngangkatka pesaka asal tu,” ku Ajat nerang.