SARATOK: Sepenyampau 4,588 rumah PR1MA udah dikemendar di Sarawak naka June 2019, ku Kaban Parlimen Saratok Ali Biju.

Ku iya, bepelasarka saut ari Menteri Pengawa Berumah enggau Kaunsil Kandang Menua, Zuraida Kamaruddin, ari kesemua penyampau nya, 621 unit udah dijual.

“Status projek berumah PR1MA di Sarawak naka 15 June 2019 iya nya 912 udah tembu digaga, 1,878 benung digaga enggau 1,798 dalam perambu.

“Kesemua rumah PR1MA ditu manggai 4,588 unit naka diatu lalu kitai beterima kasih ngagai opis menteri bekaul ti udah nerang status pemadu baru ngambika rayat bela nemu,” ku Ali.

Iya minta Opis Menteri Pengawa Berumah enggau Kaunsil Kandang Menua (KPKT) madahka penyampau projek berumah PR1MA ti udah dikemendar, benung digaga enggau unit ti udah tembu sereta penyampau peminta ti diterima enggau dikemendar di Sarawak naka diatu.

Ali Biju

Ali mantaika pinta tu nyerumba Aum Parlimen, Aum Keterubah Penggal Kedua Parlimen Keempat Belas.

Ku Ali, Sarawak begunaka urung 67,000 unit rumah ulih dibeli ke alai PR1MA nyadi sebagi ari nya.

“Peminta majak tinggi bepelasarka penyampau rumah dientak ba tanah ti nadai pemendar tauka dikumbai kitai setinggan kelebih agi ngaul rebak nembiak mindah gawa ke mengeri majak nambah.

“Tambah mega bisi besibil penerang dikeluarka Sarawak enggau piak KPKT ke alai Perintah Sarawak madah udah nyerah sepuluh bidang tanah enggau 1,223 ekar pemesai endur ngentak 12,000 buah rumah.

“Nya kebuah kitai deka nemu berapa penyampau tauka pemesai tanah udah disedia Perintah Sarawak ti nyenggala, endur ngentak rumah ulih dibeli tu,” ku Ali madah nyemetak.

Diatu ku Ali, kitai udah nerima saut positif ari menteri ti madahka diri baru nerima surat (26 June 2019) kena 3 Julai nyin tadi ngundan rintai tanah ti udah dikelala Perintah Sarawak.

“Kitai udah ulih matak seput enggau ati lantang laban udah nemu status unit rumah enggau tanah endur berumah ti ngelama tu mayuh peragam ari semua kitai.

“Taja nadai penerang silik pasal tanah nya tang bisi 13 bidang tanah udah diperambu Perintah Sarawak ngagai KPKT ngambika diperati enggau diserenih sekalika engkeman tauka enda, endur kitai ngentak rumah tu,” ku Ali nerang.