KUCHING: Indu dara beumur 18 ngagai 30 taun diperansang rejista Pekit Ratu Tagang Keempat beserimbai enggau Pengerami Tagang Entarabansa Semadang Kelima 2019.

Pengerami besai tu deka diatur tiga hari berunggu berengkah ari 30 Ogos nyentuk 1 September 2019.

Penyelaras Pekit Alvine Ngu madahka Pekit Ratu Tagang diatur 31 Ogos di Kampung Semadang, Jalai Puncak Borneo, 40 km ari indu mengeri Kuching.

Ku Alvine, sida ti kala menang ba sebarang pekit pemajik gamal ke bukai sekalika ba renggat nengeri, nasional tauka entarabansa mega tau sereta patut ngerebut peluang nyereta pekit tu.

“Pekit tu nyendiaka perais manah amat ungkup indu dara ti menggi gelar champion, deka pulai ngemai perais mata duit RM1,500, jumpang, trofi, selampai enggau perais ke bukai.

TIPAN KENANG… Pemenang Ratu Tagang 2017 Jacqueline Ayong (tengah) diapit Viviana Lin Winston (kiba) enggau Felicia Michelle Juran (kanan) sereta disempulang bala pemekit kepenudi bukai.

“Pemenang lumur dua enggau tiga deka nerima RM1,000 enggau RM500 sereta bela nerima jumpang, trofi, selampai enggau perais bukai.

“Bisi tujuh perais sagu ati lalu sida deka nerima RM200 siku kelimpah perais bukai mega bisi disedia,” ku Alvine nerang.

Ba lansa bukai ku Alvine, pemenang Miss Popular Tagang 2019 deka nerima RM500 enggau selampai.

Semua penyereta dipinta ngenataika diri ba renggat bepilih kena 11 Ogos, pukul 2 lemai lalu pemekit kepenudi patut datai ba pengawa latih ti deka diatur ba Indu Opis DBNA tauka palan alternatif ti deka ditentuka pengatur.

Barang sapa bisi ati deka nemu pasal penerang silik enggau pom pekit tau telefon nuju Alvine Ngu ba lumur 019-8949377.

Bemacham aktiviti narit ati dirintai baka pekit nginti, pengawa mandangka entukar 4WD, tanda asal enggau pekit muzik asal, bansal bejualka pemakai enggau ai irup.

Tu mega nyengkaum pemerindang ari pemenggi gelar champion Bintang RTM Rosario Ninik ari Sabah enggau penanyi ari Pontianak, Indonesia kelimpah ari pekit berapi, bekayak, main bol, pekit ngelinsu nembiak mit sereta mayuh ke bukai.