SARATOK: Pekara pengelantang rayat entara fokus besai dibai Kaban Parlimen Saratok Ali Biju ngagai Aum Parlimen sekali tu.

Ku Ali, tu nyengkaum pekara pengerai enggau servis ti bisi disedia di menua tu agi jauh tinggal lalu patut diperati enggau berat.

“Aku udah minta Menteri Pengerai Dr. Dzulkefly Ahmad nerang sekalika Opis Menteri Pengerai Malaysia (KKM) bisi perambu nyeleti klinik enggau perengka guna.

“Mayuh begunan klinik ditu udah repuk laban nadai pengawa ngintu ti meruan dipejalai, ditambah ramu udah kelalu lama enda beganti,” ku Ali.

Iya mantaika pekara tu rambau Aum Parlimen Aum Kedua, Penggal Kedua Parlimen Keempat Belas ba tanya lumur 86.

NGEMAI SADA RAYAT… Gambar ungkup kenang ba Bangunan Parlimen MP Saratok Ali Biju (kanan) begulai enggau MP Puncak Borneo Willie Mongin (kiba), MP Selangau Baru Bian (dua kiba) enggau MP Lubok Antu Jugah Muyang (dua kanan).

Ali madahka diri berasai lantang ninga timbal menteri bekaul ke alai KKM seruran keran nyeleti penyikap perengka guna pengerai selampur Sarawak nyengkaum di sitak Parlimen Saratok.

Nitihka penerang diterima, sitak Saratok diatu bisi enam buah Klinik Pengerai (KK) iya nya KK Nanga Atoi, KK Nyabor, KK Roban, KK Nanga Budu, KK Kabong enggau Klinik Pengerai Indai enggau Anak (KKIA) Saratok.

Ku iya, sekeda projek nyeleti penyikap perengka guna pengerai ungkup sitak menua tu dalam Langgur Pemansang Malaysia Lumpar Ke-11 (RMK-11) mega udah dipejalai.

“Entara projek nya baka nangkir besai agi klinik ngeli ba KK Kabong, kereja nyeleti KK Roban, nyeleti kuarters KK Nanga Atoi, nyeleti enggau ngangkatka manah sistem sambung kuasa karan KK Nyabor.

“Projek tu mega nyengkaum pengawa ngangkat manah infrastruktur ungkup pejalai sistem farmasi ba KK Nanga Atoi, KK Nanga Budu enggau KK Nyabor,” ku Ali nampung penerang ari KKM.

Kelimpah ari nya, KKM deka seruran matau gaya klinik bisi diatu lalu deka numbuhka klinik baru tauka ngangkat manah klinik bisi diatu bepelasarka peminta enggau gaya belanja menua.