SERIAN: Pengari tim nembiak ari Palan Internet Kampung Taee mujur nyadi champion kategori Pom Dua, Pekit eKelas Jaku English pengudah ngalahka lebih 400 nembiak ari 72 palan internet selampur menua.

Program ti disediaka ungkup 72 buah palan internet ari sepuluh nengeri mungkur 10,000 nembiak direjista ba portal eKelas selampur Malaysia.

Pengari tim nembiak ari Kampung Taee, John Mackwin madahka diri berasai andal pengudah diberi peluang nyereta pekit kelulu Jaku English eKelas tu.

“Aku andal laban ulih bekerejasama enggau bala kaban bukai ngambika projek kami nyapai pemujur.

“Kami macha enggau bela meretika skrip tu ngambi ulih bejaku enggau ngayanka gaya tiun jaku ti betul ,” ku Mackwin.

PEGARI NAMA…. Gokhan enggau bala pemesai bukai begambar kenang enggau tim nembiak ari Kampung Taee.

Sarawak bisi 21 buah palan internet di Kuching, Sibu enggau Miri.

Program eKelas tu asil kerejasama Maxis enggau Suruhanjaya Komunikasi enggau Multimedia ti dipejalai ba Palan Internet nyadi hab digital komuniti menua pesisir.

Nembiak eKelas seruran chakah ngaul diri ba aktiviti ti diatur di Palan Internet ari Kampung Taee.

Kelimpah nyadi champion dalam program eKelas, sida mega menang pekit ngelagu hari besai.

Taun nyin kemari, lapan nembiak udah diberi peluang nyereta Kem Kemisi Sekula eKelas ti diatur ba Kuala Lumpur.

Ketuai Pemesai Eksekutif Maxis, Gokhan Ogut madah, program eKelas Maxis tu udah mujur meri penerang pasal chara belajar ngena digital ngagai komuniti di Kampung Taee.

“Kampung Taee tu chunto pemadu manah baka ni komuniti ngerebut peluang ngena perengka teknologi ti disedia ungkup sida.

Portal eKelas tu ngemujurka pengawa ngaul nembiak enggau pengajar ti ngembuan peneleba dikena ngiga silibus ti ngembuan kualiti.

“Portal tu meri peluang ngagai nembiak ngambi ulih belajar pengudah abis kelas.

“Nambahka nya, chara belajar digaga enggau aktiviti tutorial nentuka nembiak ulih sama gawa dalam siti tim ngambika ngiga pekara ke baru kelimpah bulih penemu dalam bup,” ku Gokhan bejaku rambau Pengerami Hari Gawai ti diatur di Palan Internet Kampung Taee.

Jacques Kantuh madah, iya meri besai terima kasih ngagai piak MCM enggau Maxis laban bejalaika inisiatif nyendiaka palan kreatif enggau inovatif ba palan internet nya.

“Komuniti dia mega meri besai terima kasih laban sida bulih peluang belajar chara digital enda jauh ari rumah.

“Diatu, nembiak ditu udah diberi peluang ngansah penau, belajarka pengelandik enggau ngiru penemu ba pelajar sida,” ku Jacques nambah.

Berebak enggau nya, eKelas tu program komuniti Maxis dikena ngemanah pemutus peresa nembiak ba komuniti menua pesisir.

Program tu sebagi ari inisiatif p belajar chara digital pengudah abis kelas ngagai nembiak ari Primari Enam ngagai Pom Lima ngena chara ngerindangka ati enggau meri silibus bekualiti ngagai sida.

Silibus tu mega udah nitihka silibus ti dikena sekula Malaysia ngajar subjek Sains, Matematik enggau Jaku English.

Kelimpah ari nya, nembiak mega diberi penerang pasal belajar nengah tutorial, projek beraban, pekit enggau belajar ngena digital.

Raban nembiak Maxis mega ngambi peluang tu meri jaku peransang ngagai bala nembiak di Kampung Taee.