SARIKEI: Perintah Sarawak chakah bejalaika macham program pemansang ungkup rayat sereta nyungkak ekonomi pedagang kelebih agi raban kunteriktor Bumiputera menua tu.

Sapit Kepala Menteri, Datuk Amar Awang Tengah Ali Hassan madahka Perintah Sarawak ngagihka RM648 juta setaun dikena bejalaika projek pemansang.

Ku iya, projek tu diberi nengah Projek Transformasyen Menua Pesisir (RTP), Projek Mit Pemansang Menua Pesisir (MRP) enggau projek nyeleti rumah ungkup semua 72 Dun di baruh pegai Adun GPS selampur Sarawak manggai RM9.0 juta ungkup siti Dun.

“Projek tu deka meri peluang ngagai kunteriktor sereta ngayanka pengeran Perintah Sarawak ngangkatka kunteriktor Bumiputera.

“Sepenyampau 5,900 kunteriktor Bumiputera ba kategori kereja, mekanikal, elektrikal, pemekal enggau servis direjista ba Unit Pengerejista Kunteriktor Bumiputera dan Perunding di baruh Sekretari Pekara Wang Nengeri Sarawak.

SETIPIKIT… Naroden nyuaka setipikit anugerah ngagai siku ari kunteriktor seraya dikemata bala bukai.

“Penyampau kunteriktor Bumiputera Kelas C ngagai F di bagi menua Sarikei bisi 609 iku,” ku iya rambau pengawa nangguh Simposium Pedagang Kunteriktor Renggat Kesemilan Bagi Menua Sarikei, ditu kemari.

Teks jaku iya dibacha Menteri Muda Pemansang Dagang Mit enggau Jelan Pemesai (PKS), Datuk Naroden Majais.

Berebak enggau nya ku iya, di baruh Langgur Malaysia Lumpar Ke-11 (RMK-11), Perintah Sarawak ngemendarka projek RTP dik beungkus RM2.0 bilion nentuka semua rayat ampit ngasaika pengelantang.

Pejalai projek tu ukai semina meri peluang ekonomi ngagai kunteriktor Bumiputera menua tu aja tang meri pemaik ngagai sida ti ngemujurka polisi perintah.

“Nya kebuah aku minta Opis Residen bejalaika pengawa nyabut undi enggau lurus nentuka semua kunteriktor bulih peluang ti sama menggi projek tu.

“Kunteriktor patut nentuka projek dipejalai tembu nitihka timpuh enggau standard udah ditetap.

“Tambah mega, pekara bekaul pengelikun enggau pengelantang pengereja enggau mensia mayuh patut seruran dikemerat,” ku iya.

Awang Tengah mega ngansak kunteriktor ngerebut peluang sereta naka ulih ngemujurka projek diberi ngagai sida enggau manah.

Kelimpah ari nya ku Awang Tengah, sida enda nitihka atur enti nyerah projek tu 100 peratus ngagai orang bukai enggau niat semina deka ngulihka untung aja ari projek nya.

“Kunteriktor ulih nempa kaul bekerejasama enggau kunteriktor ukai Bumiputera tang sida patut chakah ngaul diri ba projek dataika tembu.

“Kelimpah pemansang besai baka diatu, perintah mega nyendiaka mayuh bantu belanja baka geran enggau jali ngagai bala pedagang dikena ngenegap enggau projek tembu nitihka semaya,” ku Awang Tengah nandu.

Sama datai, Menteri Muda Industri enggau Beranakka Puku Malcom Mussen Lamoh, Kaban Kaunsil Nengeri (Adun) Repok, Dato’ Sri Huang Tiong Sii, Adun Daro Safiee Ahmad, Adun Meradong Datuk Ding Koung Hiing enggau Residen Bagi Menua Sarikei Felicia Tan Ya Hua.