KUCHING: Perintah Sarawak enggau Opis Menteri Utiliti nengah Sarawak Energy Berhad (SEB) benung chakah bejalaika pengawa nyambung bekal kuasa karan nitihka pematut ngagai 99 peratus isi bilik di Sarawak datai ba taun 2020 sebedau sambung bekal kuasa karan penuh ba taun 2025.

Menteri Utiliti Dato Sri Dr. Stephen Rundi Utom madahka opis menteri iya bekerejasama enggau SEB ngerumban projek kuasa karan di menua pesisir ngambika ulih nyapai juluk nya.

“Kami ngembuan strategi enggau perambu dikena nentuka 97 peratus isi bilik menua pesisir di Sarawak deka nerima bekal kuasa karan ba pengujung taun 2020 ari penyampau kuasa karan ke diatu bisi 92 peratus,” ku iya rambau bejadika program Skim Bekal Kuasa Karan Menua Pesisir (RES) di Rumah Stia Rimau di Suai, Niah.

Pengawa nyambung kuasa karan ngagai menua pesisir udah nambah manggai 92 peratus enti dibida semina 87 peratus ba taun 2016. Sambung kuasa karan penuh tu disadang ulih dikemujur sebedau taun 2025.

“Di baruh Pelin Besai Ngerumban Kuasa Karan Menua Pesisir Sarawak, kami chakah bejalaika nyambung bekal kuasa karan ngagai rumah panjai enggau genturung pendiau ti apin disambung perengka guna pemun tu,” ku Rundi nerang.

Tu setipak enggau tuju enggau tagit RES ngerembaika pangku pengawa meri bekal kuasa karan ngagai menua ulu.

Nambahka nya, kelimpah ari RES, strategi bukai di baruh Pelin Besai Ngerumban Bekal Kuasa Karan Menua Pesisir, sida mega bisi bejalaika Skim Bekal Kuasa Menua Pesisir (RPSS) enggau Skim Bekal Kuasa Karan Alternatif Menua Pesisir Sarawak (Sares).

Program RES di Rumah Stia udah tembu dipejalai enggau nerima kuasa karan berengkah ari bulan March taun nyin tadi lalu mujur meri pemaik besai ngagai 15 pintu enggau 100 peranak rumah panjai nya.

Nitih ku penerang, peranak rumah Stia sebedau tu semina bepanggai ba injin api aja ngulihka bekal kuasa karan.

PEMAIK RAYAT… Dr Rundi (tiga kanan) rambau bejadika program RES disempulang Tuai Rumah Stia (dua kanan).