KUCHING: Chukai kerita import patut dikurang ku Kepala Menteri Datuk Patinggi Abang Johari Tun Openg.

Abang Johari madahka diri setujuka peminta Presiden Gerempung Pengimport enggau Penyual Kerita Melayu Malaysia (Pekema) Tan Sri Abang Khalid Abang Marzuki ti minta chukai kerita import patut dikurang berindik ari pangka ekonomi menua ti enda entu manah.

“Aku setujuka chukai kerita import patut dikurang laban Pekema udah bisi mantaika pengingin ati nyaga rampa menua ngimport kerita hidrogen jemah.

“Aku gaga ati meda gerempung tu udah nemu kerita hidrogen tu enda ngerugak pengelikun menua sereta selamat ngagai rampa menua,” ku iya.

Abang Johari bejaku munyi nya ba Pengerami Makai Lemai Pekema ba sebuah hotel tebilang ditu, kemari.

JAKU PERANSANG… Kepala Abang Johari (kanan) enggau Presiden Pekema Tan Sri Abang Khalid Abang Marzuki (dua kanan) ba Pengerami Makai Lemai Pekema ba sebuah hotel tebilang ditu, malam kemari.

Tandu iya, lebuh ti meda kerita ti dikena mensia di Jerman enggau Paris, dia iya ningga kerita nya enda bebunyi (enda inggar) sereta palan ngisi hirdogen diengkah ba tengah bala mayuh.

“Nyemetak bendar kerita hidrogen nadai meri empas buruk ngagai rampa menua.

“Ketegal nya, aku meda pemansang ba automotif minyak majak nurun enti dibanding enggau sel hidrogen ti ulih digaga ari ai lalu kitai kaya enggau ai nengah proses elektrolisis,” ku iya.

Nangkan nya, iya madah laban lisin ngena kerita enggau bas hidrogen ari Opis Perengka Pengangkut Darat (JPJ) agi tejanggal nya alai perengka pengangkut nya diatu bedau ulih dikena dulu di Sarawak.

“Aku ninga ba menua Indonesia udah berengkah ngena kerita hidrogen din ti nunjukka menua kitai udah dulu mansang.

“Diatu, meri peluang perintah nengeri ngepunka dulu numbuhka lima stesyen ‘3 in 1’,minyak, karan enggau hydrogen, lalu enti mujur ba ujung taun tu tauka pun taun baru kitai meru peluang ngagai menua luar,” ku iya nerang.