KUCHING: Ubah Rang Undang-undang Konstitusyen Perintah Besai nginsur umur ngundi ari 21 ngagai 18 taun meri pengandal ngagai raban nembiak milih perintah enggau ketuai ti dikedeka sida.

Kaban Parlimen Puncak Borneo, Willie Mongin madahka ubah nya meri pengandal penuh ngagai sida ngambika ulih milih perintah enggau ketuai ti deka megai Malaysia.

“Kitai udah bejalaika tiga ubah iya nya nginsur umur ngundi, otomatik rejista pengundi enggau ngemendarka nembiak beumur 18 taun nyadi chalun ba Parlimen enggau Dun.

“Ubah tu meri peluang ngagai rebak biak ti bisi ati ngaul diri ba politik bela besaup ngemai peminta ngagai aum,” ku iya.

Pia mega ku iya, ubah tu sebagi ari pekara baru enggau semaya ti dikeamatka Perintah Pakatan Harapan dalam manisfesto PRU ke-14 sebedau tu.

KENANG KAMI… Willie Mongin begambar ungkup kenang begulai enggau bala Pemesai Opis Orang Gawa di Bau tadi.

Iya mansutka jaku nya baa um pemberita rambau Program Karnival Kerjaya Renggat Bagi Menua Kuching 2019 diatur Opis Orang Gawa Sarawak ba Dewan Masyarakat Kawasan Siniawan, Bau tadi.

Ba lansa bekaul ku Willie, nembiak ti manggai umur 18 taun patut ngundi laban umur maya tu sida udah ulih ngatur enggau nirika rumah tangga lalu nyereta raban nyaga pengelikun baka soldadu enggau polis.

“Manggai 18 taun udah chukup tuai runding lalu patut dibai ngelala sereta nemu seling politik.

“Makin tumu sida dikaul ba politik, makin manah ngagai menua kitai dikena nempa pemikir enggau pengundi ari serap komuniti,” ku iya madah nyemetak.

Ngelansa pasal raban nembiak ba menua pesisir ti patut ngundi, iya madah diri deka ngatur mayuh agi aktiviti begulai enggau sida nya lalu ngenataika penerang enggau bekunsika seling politik.

“Kitai deka ngatur bemacham aktiviti begulai enggau raban nembiak dikena ngempung sida tu pansut ari ‘runding’ menua pesisir lalu nemu seling politik ti nyadi kemaya hari.

“Aku ngaku pekara tu ukai muntang dikereja tang ari kerejasama semua, kitai deka ulih ngemai ubah besai ba pengawa bepilih ti deka datai,” ku iya nampung.

Kelimpah ari nya, iya mega bisi amat pengandal rayat Sarawak diatu benung merati lalu sida deka nguing ngagai pemansang enggau pekara baru pulaika pemaik semua rayat Malaysia.