KUCHING: Sepenyampau 29 pintu Rumah Jani, Kerangan Pasu, Ulu Mukah digaga ari kayu angus lengis ba penusah urung pukul 11.30 pagi kemari.

Pemangku Sapit Direktor Opis Bomba enggau Penyah Malaysia (JBPM) Sarawak, Tiong Ling Hii madahka ketegal penusah nya ngujungka 168 peranak dia semina tinggal gari ba punggung.

“Kitai nerima penerang pasal penusah nya ari ‘WhatsApp Group’ Komiti Mutar Penusah Ngenyit Selangau lalu berumban ngesah endur penusah nyadi.

“Asil penerang diterima ba penusah nya, semina dua ruang bilik aja bisi ba rumah panjai seraya 27 ke bukai mindah kereja kayu di kampung,” ku iya nengah sebengkah penerang.

Ku Ling Hii, siku saksi benama Charly Kanang madahka penusah nya bepun ari bilik lumur 21 ti bisi orang nguan enggau bilik lumur 18.

ANGUS LENGIS… Sekeda kaban bomba meresa taba Rumah Panjai Jani, Kerangan Pasu, Ulu Mukah ti angus pagi kemari.

“Nadai sambung bekal karan ba rumah nya lalu sida serumah semina ngena injin api ngalihka malam hari.

“Saksi madahka diri enda ulih minta sah sebarang ejensi laban nadai sambung telefon dia,” ku iya nerang.

Ling Hii nyemetak madahka penusah nya semina ditemu orang luar pengudah pengajar Sekula Primari (SK) Arrau ti nengah jalai ai mansa rumah ti angus lalu ngambi gambar sereta dikunsi iya ba Facebook.

“Pejalai ngelawa endur penusah nyadi mega nengah jalai kem batang enggau ladang sawit urung dua jam setengah.

“Taja pia, nadai sebarang penusah bebadi nyawa diripot nyadi lebuh penusah nya,” ku iya nerang.

Kenu ku iya, bisi tiga kaban udah dianjung ngagai endur penusah ari Opis Bomba enggau Penyah Penusah (BBP) Tatau.

Naka diatu ku iya, kesemua sida ti tasah diau ngenduh ba rumah kaban belayan besemak.

Ejensi bukai bela nganjung bantu iya nya Opis Pelilih Selangau, Raban Nyaga Pengelikun Mensia Mayuh (APM) enggau Opis Pengintu Pengelantang Mensia Mayuh (JKM) Sarawak.