Sapa nyangka menua Bintulu kelia ti semina diuan urung 5,000 iku aja mensia, diatu nyau manggai 200,000 iku, ku Menteri Utiliti Datuk Sri Dr. Stephen Rundi Utom.

Iya ti mega Adun Kemena madah nembiak rebak baru patut nemu pasal sejarah menua Sarawak kelia enggau diatu sereta baka ni Malaysia tau nyadi.

“Sida patut nemu ba taun 1963 kelia Tanah Melayu, Sarawak enggau Sabah ngaga Malaysia kelebih agi maya nya Sarawak dipegai anak Sarawak empu,” ku iya.

Rundi madah munyi nya lebuh ditanya Suara Sarawak madahka sejarah pengelepas kitai ari pegai perintah British patut dibasa sereta dikeingatka ngambi enda lenyau.

“Ketegal pemansang ti makin nambah Bintulu nyadi palan industri ti pemadu besai di Sarawak enggau Malaysia iya nya ba Samalaju.

Menira Sarawak

“Nyadi endang patut meh kitai ngintu Hari Sarawak di Bintulu laban palan tu nyadi sebagi ari palan pesaka asal,” ku iya.

Nangkan nya, Menteri ba Opis Kepala Menteri Datuk Talib Zulphilip madah mayuh orang enda nyangka menua ti mit baka Bintulu tau ngerembai jampat dalam kandang empat puluh taun ti udah.

“Bintulu ngubah chura ba sektor pengawa puang, sektor minyak enggau gis sereta sektor teknologi moden.

“Palan bukai baka bank, opis dagang enggau palan bukai mega majak nambah di lubuk minyak enggau gis nya,” ku iya.

Ku Talib ti mega Adun Jepak, perengka guna manah majak digaga meruan baka jematan, jalai enggau palan penerebai bilun.

“Palan pelajar tinggi baka universiti enggau sekula teknikal pan bisi di Bintulu.

“Peranak Bintulu baikka peranak tulin tauka orang datai ti ngiga pengawa puang kia, endang bulih pengawa sereta peluang dagang baka orang ti berikan ti ulih muka pasar mit nyadi palan pemadu maju enggau moden ba pengawa dagang ikan,” ku iya.

Taja pia, ku iya Bintulu endang tetap ngingatka mayuh ‘sejarah’ menua nya baka aum Dun ti keterubah 8 September 1867, sereta muru ‘lanun’ dua kali ba 23 Mei 1862 enggau 12 April 1869 lalu.
“Kenu ku ‘sejarah’ nya meh jerita pengujung penatai ‘lanun’.

“Nya alai, kitai patut temegah Bintulu enda tinggal ba jeman kediatu lalu nyadi siku anak Bintulu aku berasai gaga sereta ngarapka rayat di Bintulu terus besatu enggau terus maju,” ku iya.