BINTULU: Reti 22 haribulan Julai tu patut ditemu semua rayat Sarawak.

Kepala Menteri Sarawak Datuk Patinggi Abang Johari madahka reti 22 Julai tu diberi lebuh Tun Taib Mahmud agi nyadi Kepala Menteri Sarawak ba taun 2012 udah nya diaku niang Pehin Sri Adenan Satem ti nyadi hari besai ba taun 2016.

Abang Johari madah, Sarawak diberi kuasa merintah diri kena 22 Julai 1963 lalu setuju nyadi sebagi ari perintah Malaysia ti disereta Singapura, Borneo Utara enggau Malaya maya nya.

Pia mega ku Abang Johari, Sarawak ngembuan hak enggau pengelebih baka autonomi, imigresen, tanah, kampung enggau garis entara menua ti enda ulih diubah tauka dibuai kelimpah ari disetuju Kaunsil Undang-undang Sarawak iya nya Dun.

Abang Johari mega madah, kuasa Sarawak baka OMO 1958 meri peluang ngagai Sarawak nambahka penatai pemisi meri chukai jual 5 peratus ba pengawa nyual minyak enggau produk gis berengkah taun tu disadang deka mansutka asil urung RM3 bilion ngagai nengeri Sarawak.

BEJADI… TYT Sarawak Tun Abdul Taib Mahmud bejadika pengerami Hari Sarawak di Bintulu seraya dikemata bini iya enggau bala bukai. Bela bisi dipeda Abang Johari, Douglas Uggah, James Masing enggau Awang Tengah.

Nambahka nya ku iya, Sarawak ngembuan ekuiti dalam LNG penyampau 25 peratus ti meri penatai pemisi tambah ngagai nengeri tu.

“Hak enggau pengelain ti dikembuan Sarawak tu meri pengelebih ngambika ulih nangkup peminta rayat Sarawak ba inisiatif pemansang.

“Taun tu Sarawak ngembuan bajet RM11 bilion, pemadu mayuh dalam sejarah iya.

“Bajet tu ulih dikena ngaga mayuh agi infrastuktur baka jalai alun enggau jematan ungkup pengelantang rayat enggau ngemanah penyambung rayat,” ku Abang Johari.

Iya mansutka jaku nya rambau ngintu pengerami besai Hari Sarawak 2019 di Jalai Padang Bilun Lama Bintulu, tadi.

Nangkanka nya ku iya, pengawa bejadika jematan Kuala Kemena beungkusRM250 juta deka nyambung palan bejual Bintulu enggau sitak Jepak sereta Padang Bilun Bintulu.

Ku iya nambah, penyambung infratruktur deka betambah manah lebuh bisi sekeda jematan ti deka digaga Perintah Sarawak empu.

Perintah Sarawak deka bejadika pengawa ngaga jematan Muara Lassa, Jematan Krian, Jematan Saribas enggau Jematan Rambungan sereta Jematan Long Lama ti udah tembu enggau Jematan Marudi udah berengkah dipejalaika.

Berebak enggau nya ku Abang Jihari, Sarawak mega ngembuan pemansut wang altenatif nengah Bank Pemansang Sarawak tauka dikumbai DBOS ti melanja projek bekal ai, bekal kuasa karan, RECODA, Jalai Tebing Pantai, Second Trunk Road enggau Ejensi Pemansang Kandang Menua Samarahan Bersepadu (IRSDA).

Kelimpah ari nya ku iya, tikas pemeranak puku menua luar enggau menua tu, Sarawak entara penuduk pemadu atas ba nengeri di Malaysia.

“Ba Bintulu aja kelebih agi di Samalaju, Sarawak udah mujur beranakka puku penyampau RM 13.76 bilion.

”Pekara tu mega deka nyendiaka pengawa puang ngagai 11,000 orang,lalu kesemua peyampau beranakka puku ba Sarawak ari taun 2016 ngagai 2018 bisi RM23.7 bilion,” ku iya nerang silik.

Pengerami besai Hari Sarawak ke-56 tu digulu 10,000 rayat ari pupu bansa sama ngerami hari besai tu.