Jematan Kuala Kemena

BINTULU: Pengudah Jematan Kuala Kemena tembu ila deka meri empas besai ngagai pemansang ekonomi Bintulu kelebih agi kandang menua Jepak enggau kandang ngelingi.

Kepala Menteri Datuk Patinggi Abang Johari Tun Openg madahka ari setail langkar ‘cable stayed’ nyauka ngambi gamal Golden Gate Bridge di San Francisco, iya ulih nyungkak industri betanam betupi enggau dagang temuai menua tu.

Kelimpah ari ngemandakka timpuh pejalai ngagai kandang menua besemak baka Mukah enggau Dalat ari Bintulu, jematan tu mega deka ngasuh takah pejalai entara kandang industri Kidurong enggau Samalaju semak agi enggau Mukah, Dalat enggau Jepak.

Pia mega ku iya, penanggul suntuk rumah mega deka diputar laban perintah mega ulih numbuhka genturung pendiau baru sepiak nya.

Sida ti diau di Mukah enggau Dalat mega ulih pulai mansang bekereja di Bintulu lalu perintah ulih matau rega rumah ti dikeandal enda niki ngenyit, ku iya madah ngagai pemberita.

PEMANSANG KITAI… Abang Johari bejaku ba mua mayuh.

Iya mansutka jaku tu pengudah bejadika Pengawa Nasih Tanah Projek Jematan Kuala Kemena beungkus RM467 juta ditu, lemai kemari.

Ku Abang Johari, Pala Opis Perintah Bintulu mega deka pindah ke Jepak ke alai pekara tu deka nyambung genturung pendiau enggau rummah panjai besemak sereta ngemuntang peranak nyual asil utai tanam sida.

Ku iya, semina pelin Bintulu aja mengeri di menua tu ti dilangkar enggau meruan sereta beripih kelimpah bisi pengelebih endur ti strategik iya nya besemak enggau nanga sungai.

Iya mega andal amat Bintulu bisi pengulih besai jemah ke alai kandang menua besemak nyengkaum Sebauh, Tatau deka nerima empas kelimpah nyadi pintu penama ke Bakun.

Pekara pemadu beguna ku iya, Perintah GPS deka seruran nyendiaka perengka guna enggau infrastruktur pemun baka bekal ai beresi, kuasa karan, rentayan sistem penyambung ngagai rayat kelebih agi menua pesisir.