MIRI: Siku orang tuai ti diripotka lenyau lebuh ngiga daun babas besemak Kampung Lopeng udah ditemu parai tadi.

Ketuai Bomba enggau Penyah Penusah Miri Law Poh Kiong madahka bangkai Lai Song Kong, 72, ditemu urung pukul 10.29 pagi.

“Bangkai niang ditemu urung 120 meter ari endur kerita iya paking,” ku iya nerang.

Dulu ari nya, niang nurun begigaka daun babas pukul 4.16 lemai kemari tang lalu nadai mulaika diri ke rumah nyentuk pukul 6 lemai.

Meda baka nya, anak iya lalu bejalai nyidi bekau sereta tetemuka kerita apai iya ba tisi jalai urung dua kilometer ari jalai besai enda jauh ari Sekula Sekondari (SMK) Lopeng Tengah.

Anak iya telefon minta sah raban bomba pengudah puntan tetemuka apai iya.

BERITA SINU… Raban bomba ngemai bangkai orang tuai ti ditemu besemak SMK Lopeng Tengah.