KUCHING: Sarawak deka ngena penau teknologi ba pengawa ngemansang enggau ngatur industri betanam betupi.

Kepala Menteri Datuk Patinggi Abang Johari Tun Openg madah tu nyengkaum industri florikultur ti ulih diangkat nyadi industri ti berega.

“Kitai deka chakah agi bejalaika Pansik Enggau Pemansang (R&D) mansutka bansa orkid ke baru.

“Sarawak ngembuan penau besai laban kitai deka seruran ngemanahka R&D, inovasyen produk enggau pengawa komersial ngambika ulih nangkup pinta,” ku iya.

Teks jaku iya dibacha Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah ba pengawa bejadika Aum Besai Orkid Asia Pasifik Ke-13 (Apoc13) di Palan Konvensyen Borneo Kuching (BCCK) ditu tadi.

DIPEBASA… TYT Tun Abdul Taib Mahmud enggau bini iya, Toh Puan Ragad Kurdi Taib disempulang Datuk Abdul Karim Rahman Hamzah bejadika Apoc13 di BCCK ditu, tadi. Gambar – NADIM BOKHARI.

Pengerami nya udah dipenyadika Tuai Pemegai Menua (TYT) Tun Pehin Sri Abdul Taib Mahmud.

Nangkan nya ku iya, orkid Malaysia bisi kualiti tinggi kelimpah ari ngembuan mayuh bansa.

“Diatu, orkid Malaysia dieksport ngagai menua Jipun, Eropah enggau Australia.

“Orkid Malaysia tu dipelaba deka ngerembaika makit sida ngagai menua bukai baka Amerika Syarikat ba taun ti deka datai,” ku iya.

Ku Abang Johari, Sarawak ngembuan bansa orkid ti nadai ditemu ba menua bukai.

“Bansa orkid baka Paphiopedilum Sanderianum enggau Paphiopedilum Stonei entara orkid ti pemadu mayuh dipinta sida ti rinduka bungai kampung tu lalu mayuh diguna ba pansik orkid.

“Bansa orkid tu nyadi pesaka asal menua kitai ti ulih narit temuai menua luar kelebih agi ba industri dagang temuai, nyengkaum R&D.”

Sama datai bini TYT Toh Puan Sri Raghad Kurdi Taib, bini Abdul Karim Datin Zuraini Abdul Jaabar, Datuk Bandar Kaunsil Mengeri Kuching Utara (DBKU) Datuk Abang Abdul Wahap Abang Julai sereta Presiden Apoc13 Dennis Koo.