PUSA: Regata Pusa endang bisi penau nyadi produk dagang temuai ungkup pelilih menua tu.

Tu ulih diperati nengah pemujur matak urung 10,000 temuai ari dalam enggau luar Pusa beserimbai enggau Pengerami Pusa apin lama ke udah.

Kelimpah nya, pengerami tu mujur ngerapitka kaul entara bala ketuai enggau ejensi perintah sereta peranak menua tu.

Adun Beting Maro Razaili Gapor madahka pengawa ngatur Pengerami Pusa tu dikena nerenak serakup raban bansa kelimpah neguhka kaul ungkup pengelantang komuniti.

“Nya alai, rambai jaku ‘teguh, beserakup’ tu dikeandal ulih nyadi skeda chara nempa enggau mujur.

PRODUK KITAI … Julaihi, Razaili enggau Rohani mandangka produk digaga ngena apong ti bisi dijual ba Pesta Pusa.

“Aku pechaya, Pelilih Pusa ulih dikemansang enti semengat penyerakup ulih diteguh ngagai raban bansa,” ku iya rambau Pengawa Bejadika Pengerami Pusa 2019 enggau Ngelancharka GPS Renggat Dun Beting Maro di Laman Tandang Sari, apin lama ke udah.

Nambahka nya ku Razaili, raban bansa enggau pengarap tu meri pengelebih enggau pemaik ari sukut aktiviti ekonomi bukai.

“Kebuah pia, adat enggau main asal ti nyelai ulih dikena ba industri dagang temuai, produk pemakai enggau sektor betanam betupi.

“Beduduk ari nya, aku ngarapka peranak Pelilih Mukah enggau endur besemak dia ulih seruran ngaul kerejasama ngemujurka inisiatif tu ungkup pengelantang kitai,” ku Razaili.

Nangkan nya ku Pemesai Pelilih Pusa Bujang Budin, Pengerami Pusa ulih ngerapitka kaul pupu bansa enggau pengarap ti sama mantu pangan diri kenyau ari suba.

NYIKAP DIRI… Gaya pemekit lumba perau ba Sungai Rimbas nyikap diri sebedau pekit.

“Aku ngarapka kitai ulih ngetanka kaul manah nengah pengawa ngatur pesta baka tu.

“Ba pekara ti sama, sama bela ngulihka pemujur enggau perais kelimpah bulih pengelantang enggau nerenak semengat belumba ngagai bala rayat.

“Meri pengaga ari ngagao tim Barracuda (Kampung Kalok) ti mujur menggi gelar champion ba Regata Pusa kali tu,” ku iya.

Kaban Parlimen Batang Lupar Dato’ Sri Rohani Abdul Karim madahka diri berasai temegah meda inisiatif pengawa ngatur Pesta Pusa lalu ngarapka pekara tu ulih diatur nyadi aktiviti dua taun sekali di Pelilih Pusa jemah.

“Aku pechaya, pengerami baka tu ulih matak penatai komuniti luar enggau temuai kitu.

“Pengerami tu mega dikena mandangka produk menua tu, pemakai asal enggau mayuh pematak kitai baka gula apong, ikan mata, asil betanam betupi enggau kuih.

“Kelimpah ari nya, Pengerami Pusa tu ulih meri empas positif ngagai eknomi peranak menua tu enggau meri peluang ngagai temua luar ngelala mayuh agi pekara ke bisi ba Pelilih Pusa.

“Pengerami baka tu deka nambahka pemansang ngelingi pelilih tu,”ku Rohani.

Pesta Pusa diatur Opis Pelilih Pusa enggau kerejasama Palan Servis Adun Beting Maro enggau Komiti Ketuai Komuniti enggau Raban Bansa Pelilih Pusa, ejensi perintah, gerempung ukai dikuasa perintah sereta peranak genturung pendiau mujur matak urung 10,000 temuai sepanjai Pesta Pusa 2019 ti diatur pengelama semingu berengkah ari 15 ngagai 21 Julai di Laman Tandang Sari.

Nitihka sejarah, pengerami kali tu nerima temuai ke chukup mayuh kelebih agi bala peranak menua tu enggau menua luar.

Kebuah pia, mayuh program enggau aktiviti dipejalai ungkup semua, enda ngira siang tauka malam.

Siang bisi aktiviti mandangka asil enggau produk ti dijual seraya maya malam bisi panggau pemerindang ari bala artis baka Shidi (Data), Ayai (Ilusi), Farish Malek (Mentor 7), Aisyah Akademi Fantasia (AF) sereta pengawa bemukun begulai enggau she gendang ti tebilang Sarawak iya nya Dayang Masni enggau Dayang Azura.
Bisi mega diatur pekit karaoke enggau pekit tanda nembiak mit.

Kena 19 ngagai 21 Julai tu tadi, Bala ti rinduka lumba ai sampal datai laban deka meda lumba perau rambau pesta nya.

Regata Pusa tu mujur nyadi pematak pesta kali tu nitihka perambu sida lalu Laman Tandang Sari seruran digulu mayuh orang sepanjai tiga hari lumba nya.

Tim Barracuda menggi gelar Raja Sungai Rimbas kelimpah ngulih semua pengawa lumba nya.