Perintah nengeri ngagihka RM350 juta dikena ngemujurka program tu

SERIAN: Perintah nengeri setuju agih belanja RM350 juta deka dikena ngaga sekula digempuru ba nengeri Sarawak.

Menteri Pelajar enggau Pansik Teknologi Sarawak, Datuk Sri Michael Manyin Jawong madahka sida diatu benung milih sekula mit ngambi ulih dipasuk nyadi sekula digempuru.

Ku Manyin, sekula digempuru keterubah asil sukung ari Gerempung Apai Indai enggau Pengajar (PIBG) deka digaga ba Tebedu iya nya Sekula Primari (SK) Kujang Mawang.

“Sekula digempuru keterubah tu bisi enam buah sekula primari iya nya SK Kujang Mawang sendiri, SK Tesu, SK Gahat Mawang, SK Kujang Sain, enggau SK Daha.

“Piak kami udah berandauka pekara tu enggau PIBG ba sekula nya lalu sida setuju ngaga sekula digempuru nya.

NERANG… Datuk Sri Michael Manyin Jawong meri penerang pasal sekula digempuru di Sarawak..

“Dua agi sekula digempuru deka dipejalai ba kandang menua bukai nitihka pemutus Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah,” ku iya.

Manyin mega madahka chara tu ulih ngurangka ungkus nyeleti sekula ti napi penanggul laban bisi sekeda sekula semina bisi lima tauka sepuluh nembiak aja.

Nambahka nya ku iya, piak sida udah nganjung pemesai betemu enggau Opis Menteri Pekara Wang enggau Opis Menteri Pelajar ngambi berandauka agih belanja, minggu nyin kemari.

“Pemesai kitai udah betemu enggau Pemesai Opis Menteri Pekara Wang, Opis Menteri Pelajar minggu nyin kemari lalu sida udah madahka pemutus nya.

“Penyampau utang bisi RM2.35 bilion, tang kami deka mayar RM1 bilion nyadika kontra ba pekara tu.

“Nya alai, penyampau RM350 juta dikearap nitihka timpuh laban pekara tu udah dibantai ngagai parlimen,” ku Manyin.