KUCHING: Taman Budaya (Reservoir Park) agi ditutup nyentukka operasyen nangkap lima iku ukui lelang mujur dipejalai sebedau dibuka baru ngagai mensia mayuh.

Datuk Bandar Dewan Bandaraya Kuching Utara (DBKU), Datuk Abang Abdul Wahap Abang Julai madahka operasyen besai diatur lemai ensanus ti ngaul Opis Menteri Kandang Menua iya nya Majis Bandaraya Kuching Selatan (MBKS) enggau Kaunsil Kandang Menua Padawan (MPP).

“Minggu nyin kemari kami nimbak lima iku ukui lelang laban deka dinangkap tang mujur ngelarika diri.

“Pia mega, kami kala ngaga panjuk nangkap ukui nya tang dilepaska mensia mayuh ke ba dia,” ku Abdul Wahap.

Iya mansutka jaku nya ngagai pemberita pengudah bejadika Aum Besai Orkid Asia Pasifik (APOC) Ke-13 ti dipenyadi Tuai Pemegai Menua (TYT) Tun Abdul Taib Mahmud di Palan Aum Borneo Kuching(BCCK), ditu tadi.

Datuk Abang Abdul Wahap Abang Julai

Ku Abdul Wahap, Taman Budaya tu ditapatka ukui lelang pengudah siku indu dipeda suah meri pemakai ngagai ukui nya.

“Kitai endang madahka indu nya ngambi enda meri ukui nya makai tang enda dikeibuhka iya.

“Kebuah pia, Taman Budaya tu semak sitak genturung pendiau enggau nyadi endur mensia mayuh belepa,” ku iya nerang.

Nya alai ku iya, Taman Budaya agi ditutup lalu dibuka baru nyentukka sitak nya ditukuka likun.
“Beduduk ari nya, kitai minta mensia mayuh ngambi enda meri pemakai ngagai ukui lelang tu.

“Nyema berasai kasih ngagai ukui lelang nya, bai aja sida nyadika jelu diinang,” ku iya nampung.

Abdul Wahap mega madah, atur ba pengawa nginang ukui mefa patut dipejalai nyadi siti inisiatif ngemunas igi penyakit rabies.

Piak DBKU nutup Taman Budaya ngagai mensia mayuh kena Hari Tiga tu ngambika ulih bejalaika operasyen nangkap lima iku ukui lelang pengudah siku diripotka digaga enggau diketup ukui kena Hari Dua tu tadi.

Berindik ari nya, siku lelaki ditaban ngagai Sepital Besai Sarawak (SGH) ngambika diberi perubat pengudah diketup ukui lebuh sesais.

Nitihka penerang Opis Menteri Kandang Menua enggau Pengawa Berumah, ukui nya udah ditangkap piak penerit adat lalu diatu pengawa meresa benung dipejalai Opis Veterinar Sarawak ngambi nemu ukui nya positif rabies tauka enda.

Taja Opis Pengerai sebedau tu semina ngenukuka siku orang ti sesais diketup tang bisi orang bukai digagai ukui kena Hari Dua tu tadi ti dipadah ba media rama.