Miss Ikon Baju Kurung Asli BDCF 2019

SIBU: Farisha Afdzanizam, 17 taun, dipadu nyadi pemenang Miss Ikon Baju Kurung Asli di Panggau Melayu Melanau beserimbai enggau Pengerami Main Asal Dayak Borneo (BDCF) 2019.

Gamal bajik enggau ngembuan pengandal diri ngujungka penyereta tu nerima gelar Miss Ikon Baju Kurung Asli ba pengerami ti diatur ba Laman Tun Tuanku Bujang, malam kemari.

Farisha ti ngerasuk baju kurung chura biru bekain songket chura kuning tuai mujur ngalahka empat pemekit bukai, udah nerima duit RM300, trofi enggau setipikit nyereta.

Penuduk kedua pulai ngagai Nur Ain Abdullah nerima RM200 disempulang trofi enggau setipikit.

BEGAYA… Farisha (duduk) disempulang pemekit bukai begambar kenang begulai enggau Rogayah (empat kanan) sereta temuai dipebasa bukai.

Pemekit ketiga Dania Batrisha Mohd Sukardi ngerasuk baju kurung chelum enggau kain songket mansau nerima RM100, trofi enggau setipikit seraya dua pemekit renggat kepenudi bukai nerima perais sagu ati.

Pekit bemukun mega bisi diatur nyerumba pengerami sekali tu lalu gelar champion diberi ngagai dua iku melaki bini, Abdul Rahman Anyut enggau Saibul Anas Kawi.

Lumur dua pulai ngagai dua iku melaki bini iya nya Bolhi Bakri enggau Abdul Razak Mesie, lalu lumur tiga diempu Yusuf Samawi enggau Zainal Jais.

Dulu ari nya, pengawa nyuaka perais ngagai bala pemenang dipenyadi Chairman Komiti Besai Pengatur BDCF 2019 Rogayah Jemain.

Sama datai Chairman Komiti Panggau Melayu Melanau Ibrahim Laili, Sapit Charman Panggau Melayu Melanau Nazatusyima Bujang, Sekretari Komiti Panggau Melayu Melanau BDCF Mohd Safree Mohd Kassim, Chairman Gerempung Melanau Mohamad Anis Ili, Chairman Kelab Melayu Kampung Nyabor (MUC) Anuar Taha enggau Chairman Gerempung Pengintu Pengelantang Melayu Mengeri Sibu (PKMMBS) Rabek Ali.