TEBEDU: Menteri Pelajar, Sains enggau Pansik Teknologi Sarawak, Datuk Sri Michael Manyin Jawong madah injau dulu RM350 juta dikena nyeleti sekula repuk di menua tu datai ba renggat randau kepenudi.

Kenu ku iya, pemesai ari opis menteri iya udah berandau enggau bala pemesai ari Opis Menteri Wang enggau Opis Menteri Pelajar minggu nyin tadi.

“Asil randau nya, sekeda pekara udah diputus nyengkaum bayar pinjau dulu RM350 juta.

“Aku ngarapka tu chun ba jam iya laban pekara tu patut dibai dulu agi ngagai Parlimen ngambika dikemendar,” ku iya nerang.

Iya mansutka jaku nya ngagai pemberita pengudah bejadika Program Bantu Uniform Sekula ba Sekula Sekondari (SMK) Tebedu ditu, kemari.

Michael Manyin Jawong

Manyin ti mega Adun Tebedu nerang, sekula gempuru deka dulu diberi pemerat ngena belanja RM350 juta nya.

“Nya alai sekula ti nadai entu nembiak deka ditutup lalu dipindah ngagai sekula gempuru.

“Lalu sekula gempuru keterubah ba sitak Tebedu iya nya Sekula Primari (SK) Kujang Mawang ti ngempuruka bala nembiak ari SK Tesu, SK Gahat Mawang, SK Kujang Sain enggau SK Daha,” ku iya madah nyemetak.

Iya mega madahka asil ari randau begulai enggau Serakup Apai Indai enggau Pengajar (PIBG) di Tebedu udah sepenemu ngempuruka sekula ba SK Kujang Mawang.

“Kelimpah ari nya, dua sekula gempuru bukai ditumbuh ba sitak dipegai Sapit Kepala Menteri, Datuk Amar Douglas Uggah Embas.

“Nya kebuah, chara ngempuruka sekula tu ngelimat belanja nyeleti laban bisi sekeda sekula semina bisi lima tauka sepuluh nembiak aja,” ku iya.