BINTANGOR: Siku bebadi nyawa seraya dua ke bukai balat bakal pengudah entukar 4WD ditepan sida ngelantak sebuah lori tangki enda jauh ari Simpang Jalai Kanowit Julau Durin (KJD) ditu lemai kemari.

Ketuai Opis Bomba Bintangor, Nicholas Belulin madah, iya ke bebadi nyawa ba penusah nya benama Bruin Sidu, 41 taun, lalu dua indu beumur 32 enggau 66 taun balat bakal.

Pia mega ku Nicholas, deriba lori tangki, 30 taun, enggau siku kelindan nadai apa nama.

“Seraban Bomba ngesah ngagai endur penusah nyadi pengudah nerima kangau ngenyit urung pukul 6.52 lemai.

“Lebuh datai dia, kami tepedaka sida agi tepekul dalam entukar.

KEREMPING… Gaya pendiau entukar ti ngelantak lori ba Bintangor, kemari. Gambar pemeri BBP Bintangor.

“Operasyen mansutka sida dipejalai ngena kereban bomba lalu kesemua sida ti balat bakal ditaban ngagai Sepital Sarikei.

“Taja pia, siku ari sida ditukuka raban perubat parai tekala nya ba penusah nyadi lalu bangkai niang deka diserah polis ngambika pansik bukai dipejalai,” ku iya lebuh dirandau, kemari.

Nitihka pansik tumu, lori benung ba rantau jalai nuju Sibu seraya entukar 4WD nya belaban arus.

“Kebuah penusah nyadi mega agi dipansik Polis,’ ku iya.

Pengudah operasyen tembu, Bomba bejalaika pengawa meresi jalai dikena nentuka jalai nya likun ditengah entukar bukai.