SARIKEI: Bagi Pekara Pansik Penyalah Narkotik Indu Opis Polis (IPD) Sarikei ngetan 21 lelaki nyengkaum siku indu laban disangka salah guna dadah enggau utai ditagang ba operasyen penuh ngelinggi pelilih menua tu, 20 Julai tu tadi.

Ketuai Polis Pelilih Sarikei, Awang Arfian Awang Bujang madahka operasyen berengkah ari pukul 12.01 tengah malam nyentuk 10.59 malam dipejalai enggau kerejasama IPD Meradong.

Nitih ku iya, operasyen tu dipejalai berebak selampur pelilih menua di Sarawak ari Opis Pansik Penyalah Narkotik.

“Asil penerang enggau pansik, kitai ngatur 12 operasyen ngenyit lalu 26 iku udah diperesa. Ari penyampau nya, 21 lelaki nyengkaum dua rayat Indonesia enggau siku indu ditan ba macham penyalah di baruh Seksyen 39A (1) ADB 1952, Seksyen 12 (2) ADB 1952, Seksyen 15 (1) (a) ADB 1952 enggau Seksyen 30 (3) AR 1952,” ku iya lebuh dirandau pemberita.

Ku iya, asil operasyen nya mega polis ngerampas dadah bansa Methamphethamine penyampau 12.02 gram enggau 10 leka pil Nospan.

“Kami mega bisi meresa silik nyengkaum peresa ai kemi ngagai sida tu. Berindik ari nya, sepenyampau 19 ditemu positif dadah bansa Methamphethamine lalu semua sida disangka dibai ngagai IPD Sarikei bejalaika atur ti patut.

“Aku deka madah, opis kami deka seruran bejalaika operasyen tu dikena nagang dadah ari terus tama ke menua tu,” ku iya madah nyemetak.

PENGERUSAK BANSA… Entara bansa dadah ti mujur dirampas.