KUCHING: Sepenyampau 5,790 kutak insap segerit bemacham bansa beungkus RM970,200 mujur dirampas nengah Operasyen Libas (Op Libas) Briged Sarawak Tim Gerakan Am (PGA).

Komander Briged Sarawak PGA, SAC Datuk Khaw Kok Chin madah kesemua insap ti dirampas tu disimpan ba 102 iti kutak besai.

“Kena 26 Julai (Hari Lima) jam tiga lemai tu tadi, Tim OP Libas ti betuaika ASP Norman Chendan Philip Picha Rumpang, lima iku pemansik Indu Opis (IP) Briged Sarawak enggau tiga iku pemesai Komiti Nagang Pengawa Makai Suap Malaysia (SPRM) mansik sebuah premis nadai belumur ba sebuah bengkel lori di Jalai Muara Tuang, Kota Samarahan.

“Lebuh pansik dipejalai dia sida tetemuka 102 kutak besai ti ngembuan 5,790 kutak insap bemacham bansa ti dipechaya nadai bechukai,” ku iya.

Kok Chin bejaku munyi nya ba aum pemberita OP Libas Pansik IP Briged Sarawak PGA enggau SPRM Sarawak di Indu Opis Polis (IPD) Batu Kawa ditu, kemari.

DIRAMPAS…Datuk Khaw Kok Chin (dua kanan) enggau bala tim iya mantaika insap ti mujur dirampas. (GAMBAR NADIM BOKHARI)

Ku iya, beserimbai enggau pansik nya tim sida mujur ngetan siku lelaki bansa China ti beumur 39 taun menua tu ti dipelaba orang ti ngempu barang nya.

“Lebuh ditanya lelaki nya nadai ulih mantaika dokumen ti sah bekaul enggau chukai barang lalu kesemua insap ti dirampas diserah ngagai IPD Samarahan,” ku iya.

Nangkan nya, Kok Chin nambah ba operasyen ti sebaka di Limbang (OP Libas Pansik Kompeni C Batalion 12 PGA Limbang ba hari sama ti diketuai Inspektor Mohamad Shafik Mohd Nawi udah mujur ngerampas 147 butul ai bisa bemacham bansa, empat kutak beer enggau 102 kutak insap segerit bemacham bansa ti beungkus RM172,274 dipechaya enda bechukai.

“Pansik dipejalai ba sebuah rumah Lot 1247 Sungai Poyan, Jalai Kubong, 98700 Limbang nemu semua tu lalu diserah ngagai Opis Penyasat Penyalah IPD Limbang.

“Sida mega mujur ngetan siku indu bansa China ti beumur 48 taun iya nya orang ti ngempu barang lalu narit sebuah kerita Proton Saga enggau sebuah kerita Ford Ranger ti dipelaba dikena bejalaika pengawa salah nya,” ku iya.

Nitihka Kok Chin kekedua kes tu dipansik ba baruh Seksyen 135 (1)(d) Akta Kastam 1967 sabit penyalah tau diukum enda kurang sepuluh kali ganda ungkus ti dirampas tauka RM100,000 tauka dijil enda kurang enam bulan tauka enda lebih lima taun tauka kekedua sekali enti ditemu salah.

Iya madah, kekedua barang ti dirampas beungkus lebih RM1 juta lalu tu penyampau barang ti dirampas pemadu besai naka kediatu.

“Bekaul enggau statistik barang ti dirampas ba taun tu bepun Januari nyentuk Julai dia kitai udah bejalaika tiga bengkah operasyen OP Awas, OP Batas enggau OP Libas ti ngerikodka 72 iti kes ti ngembuan penyampau barang dirampas beungkus RM16,290,548,” ku iya.