‘Pengaga ba orang bukai nyadi pengaga enggau inspirasyen ngagai aku.’

Pengaga tauka datai ari mayuh chara. Pengaga kitai tau nyadi pengaga orang bukai lalu pengelantang kitai mega tau nyadi ke pengelantang orang bukai.

Sekeda orang bulih pengelantang lebuh iya mujur mai pengaga ngagai orang bukai nengah mayuh bengkah chara.

Baik nya ari tuchum enggau ketawa kitai ti manis sereta datai ari ati ti tuchi tau ngasuh ati orang lantang sereta gaga. Meda orang bukai ke ngelilingi kitai lantang sereta ngembuan mayuh macham penemu mega tau ngasuh kitai lantang.

Nya ukai semina ngasuh lantang tang ulih mega ngasuh kitai kering ati sereta berani napi chabar ti tau mai pemujur.

Roxanne Lee

Artis kitai minggu tu bisi lain mimit ari minggu ke ngelama tu. Minggu tu kitai bekunsika berita enggau cherita ari Roxanne Lee, siku dara manis bansa China ke diatu agi besekula.

Ba konteks industri muzik Iban di Sarawak Roxanne Lee diatu begulai enggau artis MK Smokehouse ke bukai ba siti kompilasyen album. Sebedau diambi nyadi siku artis ba album nya, Roxanne Lee kala enggau masuk pekit belagu Iban ba MK Smokehouse pun taun 2018.

Maya final pekit nya Roxanne mai lagu Melayu enggau lagu English. Ketegal pemanah vokal enggau gaya iya ti tau dikumbai “perfect package” nyadi artis, MK Smokehouse terus ngambi iya nyadi siku artis iya. Taja pan pia, Roxanne Lee ukai semina mai lagu Mandarin tauka English tang lagu Iban mega. Taja enda nemu bejaku Iban tudah tuai ulih mai lagu Iban.

Pemujur ba pekit belagu

Sekeda ari pengawa pekit belagu ti udah kala dipasuk Roxanne Lee nya Grand Intetnational Music & Talents Festival Vocal Category (Grand Champion), State Level Secondary School Singing Competition (Champion), Miss Sarawak Kebaya (lumur dua), Waterfront Idol (lumur dua), Berjaya TeenStar Challenge (lumur tiga), Alfresco’ Voice 5.0 (lumur tiga) enggau MK Smokehouse Singing Competition (lumur dua).

Pemujur enda datai pia aja. Ditanya sekalika iya bisi enggau orang belajar ba kelas vokal, Roxanne Lee
madahka kala masuk kelas nya.

Roxanne Lee

Dalam taun 2017 suba bisi enggau belajar vokal ba ABRSM. Ba kelas nya sida bisi peresa teori enggau pratikal. Laban sigi bisi penau enggau pengelandik dibai ari mit, Roxanne Lee bulih pemutus ti chukup badas. Ketegal pemutus iya ti chukup badas nya, Roxanne diasuh belagu ba High Scores’ Performance.

Munyi ku penemu ba pun karang tu tadi, pemujur kitai datai ari sesebengkah utai. Ba jaku bukai, pemujur datai nama utai ti meri kitai pengering tubuh enggau semengat.

“Ba aku, orang ke pemadu beguna ba aku nya ukai semina diri sebilik aja tang bala pangan ke begulai enggau kitai ninting hari mega tau mai pengering enggau pengeras ati. Maya ke merindang atas panggau, aku mai pengaga ngagai orang.

“Pengaga sida nya mih ti nyadi pengering enggau inspirasyen ngagai aku. Idup ba dunya tu meseti bisi meri lalu bisi mega nerima (give and take)”, ku Roxanne madahka kunchi pemujur iya ti bendar ba pengawa belagu.

Berita penuh deka dibantai ba Suara Sarawak pagila 27 Julai 2019 (Hari Minggu)

LAGU BARU…Kulit album Bujang Keling Sarawak ti deka pansut enda lama agi. Roxanne (dua kiba) begulai enggau artis MK Smokehouse ke bukai.