KUCHING: Perintah Sarawak setuju meri elaun RM300 siku ngagai bala kaunsilor lalu berengkah dipejalai sehari tu.

Kepala Menteri Datuk Patinggi Abang Johari Tun Openg madah elaun nya enda nyengkaum elaun sida datai baum.

“Sebedau tu, bala kaunsilor semina nerima elaun ti dikira nitihka penyuah sida datai baum.

“Kami ari perintah dipegai Gempung Parti Sarawak (GPS) setujuka perambu meri elaun tu nambahka elaun ke bisi diatu,” ku iya nerang.

Abang Johari mansutka jaku nya lebuh bejaku ba Pengawa Angkat Sumpah enggau Licha Kaunsil Kandang Menua (PBT) ba sebuah hotel tebilang ditu, tadi.

Nangkan nya ku iya, bala kaunsilor tu nyadi orang ti ngetuaika bala rayat ba menua tu.

“Nya kebuah bala kaunsilor patut ngembuan kaul ti manah enggau bala rayat laban nya sebagi ari pekara pemadu beguna.

“Kita patut ngatur menua dipegai enggau holistik lalu ngubah chara atur kita nitihka singkang pemansang dunya,” ku iya madah nyemetak.

Beserimbai enggau nya, bisi 765 kaunsilor ngangkat sumpah seraya 40 peratus tauka 318 ari penyampau nya baru dichiri mangku pengawa.

Sida tu berengkah bejalaika tanggungpengawa ari taun 2019 ngagai 2021.

KENANG… Abang Johari (tengah), Sapit Kepala Menteri Datuk Amar Douglas Uggah Embas (empat kiba), Sapit Kepala Menteri Tan Sri James Jemut Masing (empat kanan), Menteri Pengawa Berumah enggau Kaunsil Kandang Menua Datuk Dr. Sim Kui Hian (lima kanan) sereta bala pemesai begambar kenang ba Pengawa Angkat Sumpah enggau Licha PBT ditu tadi.