KUCHING: Datuk Bandar Majlis Bandaraya Kuching Selatan (MBKS) enggau Majlis Perbandaran Sibu (MPS) deka ditentu enda lama agi, ku Kepala Menteri Datuk Patinggi Abang Johari Tun Openg lebuh ditanya sapa bagi deka mangku pengawa Datuk Bandar ke baru ba kededua opis kaunsil nya.

Ku Abang Johari, pekara nya deka diputus enda lama agi lalu diatu kitai semina nganti pekara nya dibantai.

“Anti aja dulu sapa bagi deka dipadu mangku pengawa tu laban pekara tu deka diputus enda lama agi.

“Anang guai nulak tauka ngelaungka sida ke agi bejalaika pangku pengawa ke diatu,” ku iya minta.

Abang Johari mansutka jaku nya lebuh aum pemberita pengudah Pengawa Angkat Sumpah enggau Licha Kaunsil Kandang Menua (PBT) ba sebuah hotel tebilang ditu tadi.

NERANG… Ari kiba: Sapit Kepala Menteri Tan Sri James Jemut Masing, Abang Johari enggau Sapit Kepala Menteri Datuk Amar Douglas Uggah Embas rambau aum pemberita ba sebuah hotel tebilang ditu tadi.

Ku Abang Johari, sida ke lama mengkang bejalaika pengawa baka selama seagi timpuh gawa bedau tembu.

“Timpuh sida deka tembu ba ujung bulan Ogos tu.

“Pia mega Dewan Bandaraya Kuching Utara (DBKU),” ku iya nerang.

Apin lama ke udah, Kaban Kaunsil MBKS ba sebengkah penerang berita madahka mayuh orang berebut deka ngulihka penuduk datuk bandar pengudah servis datuk bandar ke diatu, Datuk James Chan tembu 31 Ogos tu.

Datuk bandar MPS ke diatu Datuk Tiong Thai King ti mega Kaban Kunsil Nengeri (Adun) Dudong ti udah megai tanggungpengawa nya pengelama 15 taun seraya DBKU dipegai Datuk Abang Abdul Wahap Abang Julai berengkah ari Ogos 2011.