JULAU: Peranak di pelilih Julau badu agi kiruh bebelika minyak ngagai Sarikei tauka ke Sibu Jaya pengudah stesyen minyak tembu ujung taun tu tauka ba taun baru.

Berita manah tu dibantai Kaban Parlimen Julau Larry Sng nengah laman Facebook iya tadi.

Penerang nya madahka Opis Menteri Pengawa Dagang Dalam Nengeri enggau Pekara Orang Bebeli Barang (KPDNHEP) udah ngemendarka lisin stesyen minyak digaga di Julau.

“Arapka ujung taun tu tauka pun taun 2020, orang Julau ulih ngisi minyak ba stesyen Ecxel Julau ditu.

“Enda ibuh mindah jauh (ngisi minyak) ke Sarikei tauka Sibu Jaya,” pia ku iya madah.

Kelimpah ari nya, Larry mega meri jaku terima kasih ngagai Menteri KPDNHEP Datuk Seri Saifuddin Nasution Ismail.

Tebal agi timbal diterima ari rayat ke diau dia enggau kandang menua besemak Julau madahka penerang nya berita manah ngagai sida sereta meri sukung tegut pengawa nya.

Kelimpah ari nya, mayuh mega bala meri terima kasih ngagai Larry Sng lalu sekeda sida ngarapka iya majakka pengawa nyaup mutarka penusah ditapi rayat.

Rayat mega bisi minta iya berundingka rega lada nyengkaum inisiatif dipejalai kaunsil ti betuaika Larry empu nentuka pengelantang pekebun lada menua tu diintu meruan.

Larry Sng