Ajat Iban: Enda punas ngapa

KUCHING: Nempa pelasar serap umur nampung penemu, penau enggau pengelandik mantaika tanda asal raban bansa Dayak Iban nipakka tuju numbuhka serakup Ngajat Asal Iban (Ngasi) Sarawak.

Presiden iya, Ajat Sumoh madahka batang tuju serakup nya ditumbuh endang deka ngetan enggau ngintu ajat Iban taja jeman nguing ngagai pemansang teknologi digital ti tau ngasuh main asal tu lenyau jemah.

“Tuju kami dibantai nengah kelas ajat ti diatur kami sebuat kenyau ari serakup ditumbuh dalam taun 2015 lalu udah dikemendar ROS kena 9 March 2016, kelimpah ari kelas main asal bukai.

“Nya kebuah kami semampai meransang raban bansa Dayak kelebih agi rebak baru belajar enggau ngiri penemu nengah kelas ti diatur nentuka main asal tu ulih ditampung rebak dudi,” ku Ajat madah nyemetak.

Asal Enggau Tuju Ajat

AYUN LUNDAI… Sida ke indu chukup ngepan mantaika Ajat Iring dikena ngelalu penatai bala temuai.

Nitih ku kenang leka ensera enggau sebut leka tusut, tanda asal dikumbai ajat tu keterubah dipelajar bansa Iban ari siku Petara benama Ulup Baru Lichin, Bujang Ilang Lengain.

Taja pia ku Ajat, cherita ti nyentuk agi enda ulih dipansik laban orang ke tuai ti ditampung enda ulih madah enggau nyemetak sereta nadai rikod meruan ngerintaika asal penatai ajat tu ba kitai bansa Iban.

Nyau deka genap pengerami kitai Iban endang enda ngelaungka tanda asal tu lalu disempulang tabuh enggau tempap gendang.

“Enti agi kelia, kelimpah ari dikena merindang ati, mandangka penyikar bekuntau bepencha, bebuti maya melah pinang enggau ngelaluka temuai, ngajat tu mega dikena merindang semengat padi tauka dikena bebasaka semengat nya.

“Nitihka pengarap lama menya, enti kitai siru ngintu padi, dia antu padi deka begulai enggau sida lalu ngujungka bulih padi, pengawa bumai deka mansutka mayuh asil ari berekat.

GAP… Sida ke lelaki belanjang enggau ngepan bujang berani ngajat ngemai terabai enggau nyentak ilang mantaika Ajat Bunuh.

“Pia mega maya Gawai Batu, Raja Simpulang Gana dikangau ngena leka pengap enggau sampi lalu penatai iya deka dialu ngena piring sereta main asal baka ngajat.

“Baka nya mega enti bisi temuai datai niki ke rumah kitai, iya deka disambut ngena basa lalu ngalihka lemai hari deka diperindang ngena ajat dikena masa penatai tudah,” ku Ajat nampung kenang sida ke tuai.

Bungai Ajat

Ajat tu tau lalu ulih dipelajar enggau dibantai sebarang orang, enda milih indu tauka lelaki, tuai tauka biak.

Sebedau sida mantaika bungai ajat, dulu agi nyembah meri basa ngagai orang ti ngemata udah nya baru ngatur singkang nitihka rentak tabuh.

SEMAIN… Ajat deka timpang enti enda ditimbal ngena tabuh.

“Entepa kiba peling kanan sereta tubuh chundung baka deka rebah lalu bediri baka tejingkauka sadau, meremi baka deka terengkah ba tikai enggau jari dikepai, kaki disingkang, ama surut, ama mansang.

“Nerais sereta engkechit, bisi maya merejuk sereta manjung. Terabai dijapai lalu dipegai seraya ilang disintak lalu dibiau. Lesung dipanggum jari dikitau. Pala gilik-gilik, buah isi getik-getik, mata kalik-kalik. Nya mih sekeda bungai ajat,” ku iya nerang silik.

Sida ti ngajat tu siku-siku sekali angkat lalu suah mega angkat seretai ngajat beraban.

Orang ti tampak agi kening lalu suah agi dibatak ngajat maya beranchau tikai dulu agi ari orang bukai, iya nya orang ti suah agi pegi bejalai ngagai menua bukai lalu beberita datai di menua sekumbang pegi belelang ngiga kereja tauka nampuk penemu.

ENDA PUNAS NGAPA… Serakup Ngasi Sarawak betuaika Ajat Sumoh keran ngetanka main asal kitai Iban.

“Tebal agi tubuh sida tu penuh laban ukir tauka kelingai ti ngenjing begenarau baka likau sawa ari pegu nyentuk gerempung tapa kaki tauka jari.

“Agi menya ukir nya tanda sida nakal ngenatka pemedis lalu ukir ba tunjuk jari dikumbai Tegulun mandangka sida kala bedengah pala munsuh lebuh nurun ngayau.

“Bebida enggau ajat lelaki, ajat sida ke indu lemi agi sereta ayun lundai ari gaya. Sida mega enda engkechit, enda merejuk, nadai ngena ilang enggau terabai sereta enda manggum lesung.

“Pengelembut sida ngajat, lingguk punggung enggau kepai jari sida. Sema jaku sida ke tuai, tau ngasuh sida ke lelaki enda tesintakka seput, enda engkesap mata. Indah munyi ku sempama ngenung baka empelekung mabuk ambuh, ngetu baka puyu mabuk keruh,” terang iya.

Bansa Ajat

Ngajat tu ku iya bepelasarka atur singkang enggau tuju ngajat lalu ulih dibagi kitai ngagai lima bengkah iya nya Ajat Bunuh, Ajat Semain, Ajat Iring, Ajat Nanggung Lesung enggau Ajat Kelulu.

Ajat Bunuh dimain pungka lelaki Iban ti beberita landik ngajat, sikar, landik bekuntau tauka udah kala enggau orang ngayau sereta kala bedengah munsuh.

Ajat tu tau dibagi ngagai tiga bansa iya nya Pencha, Kuntau enggau Tembung lalu tu endang tulin gaya singkang ajat lelaki ti diumba enggau rentak tabuh ti jampat setipak enggau pengelanchat jari orang ti ngajat ti ngenjing betabu-tabu nguji nyilat tumbuk munsuh ti diperagam benung ngelaban iya.

Lebuh ngajat, kadang-kadang pengajat ngena ngepan penuh, ngemai terabai ti diukir bechanagir buah Gerasi sereta ilang ti rimbun bejejabung buk munsuh.

Kedua iya nya Ajat Semain ti suah dimain sida ke biak dikena merindang lemai, lebuh nyambut temuai, tauka dikena lebuh bepekit ka pengelandik ngajat.

Ajat tu dimain ngena gaya singkang ti liut-lembut diumba enggau tabuh Anyut Ai lalu maya ngajat, kepai jari enggau tubuh sereta singkang kaki pengajat berupai bendar lembut, ngenjing giau-giau enda salah-salah baka daun nyiur ditiup angin begadai-gadai.

Udah nya Ajat Iring ti dimain sida ke biak dikena ngiring temuai, sida ti ngambi indu, bala pengabang, pemesai tauka dikena ngelaluka Petara bejalai niti rumah maya Iban bisi begawai.

Ajat tu mega suah disebut kitai Ajat Titi Ruai lalu rentak tabuh ti dikena ba ajat tu sama enggau rentak tabuh Ajat Semain, enda berumban sereta leka tabuh terang didinga.

Nangkan nya Ajat Nanggung Lesung ti dimain pungka lelaki ti gagah nanggung lesung ngena penguat rang enggau ngeli.

Ajat tu nyau deka sama enggau pengelubah ajat Semain lalu utai ti mida ajat tu ari bansa ajat bukai iya nya laban ajat tu beguna ke lesung.

Kelimpah ari nya, ajat tu mega nunjukka pengering pengajat manggum lesung ngena ngeli iya sereta belubah-lubah ngengkahka lesung nya tadi ba endur asal seraya ngepaika jari sereta ngentakka kaki nitihka leka tabuh.

Kepenudi iya nya Ajat Kelulu dikena orang bungah maya bebuti nembuka gawai ke alai sida ngeluluka ulah pangan diri, ti dikenatai ngena pengelandik singkang maya ngajat.

Ba ajat tu, pengajat enda tentu pedulika pemanah rentak tabuh, lalu enda mega begunaka ngepan penuh lalu utai pemadu beguna iya nya pengelandik enggau pemungah ngeluluka ulah pangan diri sambil nitihka rentak tabuh.

Ambika banding, sida ke indu suah ngajat ngeluluka ulah lelaki ke buyan larika jelu maya ngasu seraya sida ke lelaki suah ngajat ngeluluka sida ke indu ti ngelusu nutuk enggau nyauk, nyumai tauka ulah indu beribunka anak. Gaya singkang sida ke ngajat endang sengaja dikelulu kena ngasuh orang ketawa, geli ati.

Kelimpah ari lima batang ajat ti udah dikenang nya tadi ku Ajat, agi bisi bansa ajat bukai ti mit sereta nyau nadai tentu dikingat agi baka Ajat Pama, Ajat Kera, Ajat Gerasi Tunsang, Ajat Tempurung enggau Ajat Turun Tupai.

Semua bansa ajat tu tadi dimain ngena rentak tabuh ti lubah laban nyau deka sebaka enggau gaya Ajat Kelulu.

Tabuh Nimbal Ajat

Penyampau tubuh sida ti betabuh dikena ngajat bisi empat ke alai siku ari sida nempap Gendang tauka dedumbak, siku nabuh Tawak, siku nabuh Bebendai lalu siku nabuh Engkerumung.

Maya betabuh, iya ti nabuh Bebendai belabuh dulu laban dikena nentuka penyampat enggau pengelubah rentak tabuh, ditimbal Gendang ditangkan enggau Tawak lalu dientudi Engkerumung.

Ari dinga pending orang ti enda teleba, rentak tabuh dikena ngajat munyi dua bansa aja, iya nya rentak lubah enggau rentak jampat.

Ke bendar, tabuh ngajat bisi mayuh bengkah baka Ayun Lundai, Ai Anyut, Sinu Ngenang enggau Tanjak Ai.

Tabuh tiga bansa ti keterubah nya lubah rentak lalu suah dikena Ajat Semain, Ajat Iring enggau Ajat Kelulu seraya rentak tabuh Tanjak Ai tu jampat lalu dikena ba Ajat Bunuh.

Bisi mega rentak tabuh bukai ti enda besangkut-paut enggau ngajat baka rentak Tinggang Punggung ti ditabuh maya ngambi indu enggau rentak tabuh Rayah dikena ngerandang jalai.

Gaya Ngepan Ngajat

Pendiau orang ngajat berupai bisi penimpang enti iya enda ngena ngepan asal Iban ti chukup.

Sida ke lelaki deka ngerasukka sirat panjai, tebal agi bechura mirah tauka bebungai lalu bepayaka kain ti disungkit seraya iku sirat dikelapung ngena gerunung puru ti manah bendar munyi lebuh engkechit sereta ngentakka kaki sambil nyintak ilang ti ditangkin.

Pala ditangkupka ketapu rutan ti diujakka lelanjang bulu ruai, langgai tajai tauka bulu kenyalang, manding bebaju kebat dikumbai Baju Burung ti beukir mayuh leman.

Dada disengkabung ngena gagung kulit remaung raras tauka beruang rambai. Rekung dikungkung marik rantai lalu berang dipasuk simpai pirak tauka simpai tapang.

Ilang ditangkin bejejabungka buk munsuh begelung, bauh ngelegetang enggau terabai ti dipegai bekenarau penuh ukir lalu betis dipasuk enggau engkerimuk ti digaga ari pirak sereta diselat ngena unus ti digaga ari runut aping pengerang.

Sida ke indu ngena kain sungkit ti ditating enggau ringgit pirak sereta punggung dikungkung rawai rinyai nungkat ka kerigai rusuk marang, dililit ngena lampit pirak.

Dada dibap ngena selampai ti diburai enggau leka marik bekengkang, pending disumping ngena antin mas, pala diujak ke sugu tinggi sereta dekuan nyeritan dikungkong gelang enggau buku ali dikungkung ngena gerunchung temaga tauka pirak.

Tibar Peransang

Semua bansa bisi ngembuan, nyimpan enggau ngintu sereta mandangka main asal diri empu kelai penatai bsida.

Kelimpah ari ngayanka pengeraja bansa ba main asal, pengawa baka tu mega ulih ngempung enggau neritka simpul kaul serakup bansa laban sida bisi penaluk enggau pengangkun sereta bepenemu ba main ti sama.

Nya alai, ajat enggau main asal bukai enda tau enda dipelajar sereta dikembuan bansa Iban kelebih agi ditampung ngagai rebak baru dikena ngelai bansa diri, dikena mandangka pengeraja main asal sereta dikena berakup.

Mayabelajar ngajat, kitai mega belajarka jalai basa enggau jalai ngemas diri ba mua orang mayuh. Main asal tu mega tau matak penatai temuai ngagai menua ti tau diangkat nyadi pemansut belanja sereta nyungkak ekonomi kitai.

Nembiak rebak baru nadai ngira sida ke diau di rumah panjai tauka di mengeri enda patut malu belajarka main asal tu laban sida nya mih dikeandal nurunka main asal tu ngagai rebak dudi.

Enti sida ke biak enda nemu sapa agi dikarapka ulih ngetanka main asal tu laban diatu semina orang tuai aja agi nemu pasal main asal tu lalu patut dipeturun ngagai nembiak rebak baru, tandu Ajat.

“Berebak enggau nya mega, raban bansa Iban patut ngelala bida adat enggau pengarap.

“Pengarap nadai nagang raban bansa Iban majakka main asal aki ini taja pan udah megai pengarap Kristian.

“Taja bansa Iban udah mayuh megai pengarap Kristian, main asal bansa diri empu endang patut dijaga ngambika bisi dipeda nembiak rebak dudi,” tandu Ajat nyemetak lebuh dirandau Suara Sarawak.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak