Asil pengelandik jari muntang dikerembai

Pangka pemansang nuju Revolusyen Industri 4.0

KUCHING: Gagit enggau rinduka pengawa bekunsi penemu kelebih agi ngaul pengelandik jari diatu nyadi muntang agi dikerembai nengah dagang digital.

Ku Louis Kelaman, iya nadai ngira pengelelak, jauh deka mantul ati ketegal dibai ati keran enggau angkunka pengawa tu kenyau ari mit, ditambah dunya diatu majak mansang nuju Revolusyen Industri 4.0 (IR4.0).

“Pengerindu kitai mensia siku-siku endang enda sebaka lalu tu ke bendar pengelebih diberi petara kena kitai beridup kelimpah ngintu pesaka asal bansa ti nyadi identiti tauka kelai kitai.

“Jaku pejah enda ulih dikira kitai lalu tu mega nyadika peransang aku nyingkang jauh agi ke mua, nyapai juluk ati enggau ngemujurka diri ba pengawa dikerindu.

KENANG KAMI… Louis (bediri, kanan) enggau Datin Dorren Mayang (duduk, tengah) disempulang bala bukai begambar bebala mayuh ungkup kenang jemah.

“Aku rindu mantaika utai digaga jari diri empu laban tu ulih mansutka asil sereta meri peransang enggau semengat ngagai orang ti sama ngembuan pengelandik.

“Ari kitai mantaika diri empelah, kekutap mantaika pengeringat enggau macham utai enda sekena sebelah media rama, manah agi pelasar aplikasyen online tu dikena ngemansangka diri kelebih agi ba dagang, bisi mega asil,” ku Louis, siku ari pedagang enggau pengajar asil pengelandik jari di menua tu.

Louis mansutka jaku tu lebuh dirandau Suara Sarawak pengudah tembu atur Bengkel Kain Buriek enggau Baju Ujan ungkup Raban Nembiak Bukit Saban ti dipelanja Datin Amar Dorren Mayang, iya nya bini Sapit Kepala Menteri Sarawak, Datuk Amar Douglas Uggah Embas.

Berindik ari nya, Louis chakah ngatur bengkel enggau workshop ukai semina di Sarawak aja tang dataika menua Semenanjung Malaysia, Sabah sereta Brunei Darussalam enggau Kalimantan di Indonesia.

Semua pejalai bengkel enggau workshop tu ku Louis endang datai ari peminta sida lalu iya semina datai ngajar enggau nyendiaka kereban dikena belajar.

MANDING… Kerubung buriek dikena ngelagu gaun ngena bungai pua kumbu chukup manah dipeda.

“Sekeda sida tu meda tauka macha pemujur ditempa aku sebedau tu nengah media rama baka Facebook enggau link WhatsApp ti dikunsi aku sereta berita pasal pengawa mega ulih digiga nengah Google enggau portal berita bukai.

“Ari nya sida deka berandau enggau aku lalu nyapai jaku pemutus pasal atur pengawa ti deka dikereja, nitihka pengelantang siku-siku lalu enti tubuh udah chukup, sida deka netapka hari bulan aku datai ngajar,” ku Louis nerang silik sekeda ari pejalai pengawa iya.

Kelimpah ari nya, Louis mega nyelinting raban indu kelebih agi indai tunggal di menua pesisir baka di rumah panjai enggau genturung pendiau bukai dikena mantu sida ngiga belanja ngambika enda kelalu ngandal enggau semina bepanggai ba bantu perintah aja.

“Semua tu dikereja aku ukai ketegal deka nunjukka diri pandai tauka landik, tang deka meda kitai bansa angkat nyerumba bansa bukai maju ba industri pengelandik jari tu laban aku nemu pengaya enggau penyelai kereban penganta dikembuan kitai.

“Ari kereban ngepan indu enggau lelaki kitai bansa Dayak Iban ti bebida nitihka menua lalu tu nyadi pengelebih ti ulih dikemansang kitai nyadi dagang ti ulih rembus ngagai makit entarabansa, dijual nengah online.

NARIT ATI… Sekeda ari setail bungai buriek ti dijait atas kain baldu asil jari Louis empu.

“Semua pengawa dagang ditu ku nembiak kemaya hari ba ujung tunjuk aja, semua utai ulih nyadi tekala nya, transaksyen tauka chara bayar pan udah maju laban diatu kitai bisi SarawakPay enggau chara bayar online ke bukai,” ku Louis nerang silik.

Ngelansa pasal bengkel sehari nya ku Louis, iya meri terima kasih besai ngagai bala penyereta enggau Datin Dorren empu ti udah pechayaka sida ari Kaunsil Pemansang Kraf Jari Malaysia Pampang Sarawak beduaka penemu.

Sepenyampau 20 penyereta nyengkaum Datin Dorren empu udah ngambi bagi ba bengkel ti diatur ba Yahos School of Skills di Batu Kawah New Township ditu, apin lama ke udah.

“Tu ketiga kali udah ngangauka aku ngajar bala kita sebuat ba pengawa nengkebang asil pengelandik jari lalu timbal chukup manah sereta pengawa kitai mujur baka ti diperambu.

“Rindu meda asil jari ditempa kitai sebuat lalu aku ngarapka penemu tu deka dikunsi enggau rebak baru ngambika iya seruran ngerembai sereta ditampung sida rebak dudi nentuka iya enda punas ngapa,” ku Louis andal.

Ngelansa sekeda ari penau dikembuan diri empu, Louis bisi nyendiaka servis ngajar ngaga sugu tinggi, nyait buriek enggau busuk baju ujan sereta ngaga sabun ari madu kelulut kelimpah bejualka kereban ngepan bukai ngena chap dagang LouisWesly Enterprise.

“Aku bisi nyual macham bansa kereban ngepan indu enggau lelaki ti ditengkebang jari diri enggau nulung bala bukai bejual, bisi nya digaga ari temaga enggau tulin pirak lalu bisi mega sepuh pirak.

“Tu nyengkaum sugu tinggi, rawai, tumpa, baku temaga, sirat, selampai, sementing ringgit, tumpa rangkup digaga ari papan pirak enggau mayuh ke bukai, nyau enda ulih dirintai ditu,” ku Louis seraya tuchum.

Tanya silik enggau penerang bukai tau ngelawa Louis Kelaman nengah link Facebook iya https://www.facebook.com/louis.ez.5 enggau telefon nuju lumur 019-234 4562 tauka 019-486 8476.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak