Pengelantang rayat Saratok dikenati

SARATOK: Pengelantang rayat ukai semina ditentuka pemisi penyikap perengka guna pemun enggau infrastruktur aja tang patut betatika pekara pengerai.

Ngenatika pemesai guna ngintu pengelantang rayat ba sukut pengerai, Kaban Parlimen Saratok Ali Biju ngemai pekara tu ngagai Aum Parlimen ti benung diatur diatu.

Ali minta Menteri Pengerai madah sekalika Opis Menteri nya bisi perambu nambahka penyuah atur pejalai lutur terebai ngagai klinik ti bisi di sitak Parlimen Saratok.

Kebuah pia ku Ali, rayat diarika iya napi penanggul besekut maya nerima perubat ba Sepital Saratok lalu tu ngasuh sida berasai enda lantang.

Nya alai ku Ali, iya ngarapka sebana rayat tu ulih diperati opis menteri bekaul sereta ngiga jalai pemutar nitihka pematut.

Ali Biju

Ali mansutka pekara tu lebuh mantaika tanya Aum Kedua, Penggal Kedua Parlimen Keempat Belas.

Nimbal tanya Ali nya, Opis Menteri Pengerai (KKM) seruran bejalaika pengawa ngurangka penanggul sekut ba fasiliti pengerai nyengkaum nambahka penyampau tubuh staf gawa enggau penyuah pejalai lutur terebai.

Pia mega ba sitak Parlimen Saratok enda dikelaung ke alai bisi 15 buah Klinik Pengerai (KK) – Jenis 4 enggau 7, lalu penyampau lutur dianjung gawa mendam udah ditambah ari 19 (2018) ngagai 49 (2019).

Servis pejalai lutur pakar perubat ruang bilik betimpuh diatur abis nadai sekali sebulan nitihka peminta enggau penau ke bisi.

Ninting taun KKM deka nyendiaka peminta ngisi pengawa puang ngagai Ejensi Perintah Besai tang penyampau orang diambi gawa bepanggai ba belanja perintah diatu.

Kandang diatu, seriris enggau polisi ngelimat belanja perintah enggau natak penyampau tubuh orang gawa perintah, chara dikemeran iya nya bekena orang gawa ti optimum ari bekenaka sida ti gawa diatu nengah chara nusun baru agih pengawa (redeployment) tauka besilih (trade off).

Berindik ari nya, Ali ngarapka rayat nemu sereta meretika perintah besai nadai kala neju tauka enda ibuhka sebana sida tang naka ulih meri pengelantang enggau ngasaika tikas idup meruan agi.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak