Pilih pemakai ti bepengerai

Penyakit buah punggung nyadi bepun ari pemakai enggau daya pengidup ti enda bepengerai

KUCHING: Penyakit buah punggung nyadi bepun ari pemakai enggau daya pengidup ti enda bepengerai, ku Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah.

Ku Fatimah, nitihka ripot diberi Opis Pengerai Nengeri Sarawak (JKNS) bisi 3,317 iku rayat nengeri tu ditemu bisi sakit buah punggung ba taun 2018.

“Ari penyampau nya, sepenyampau 2,920 iku benung berubat dialisis.

“Sepenyampau 275 berubat ngena chara ‘Continuous Ambulatory Peritoneal Dialysis’ (CAPD) tauka ngena plastik lalu laluh ke bukai mujur bejalaika proses mindahka buah pinggang nengah chara operasyen,” ku iya.

JAGA BUAH PUNGGUNG….Datuk Sri Fatimah Abdullah enggau Dr. Saadiah Abdul Samat (tengah) begulai enggau bala bukai mandangka tanda ‘Sayanglah Buah Pinggang Anda’ pengudah tembu licha pasal buah punggung di Kuching, kemari.-Gambar Gazhali Bujang

Fatimah madah munyi nya lebuh bejaku ba aum pemberita pengudah Bengkel Langgur Meri Skim Bantu ngagai Orang Sakit Buah Pinggang di Sarawak bepalan ba sebuah hotel tebilang ditu, kemari.

Nangkan nya ku iya, nitihka ripot JKNS, orang laki mayuh agi kena sakit tu dibanding enggau orang indu.

“Nitihka tikas umur, tebal agi sida berumur 55 taun ke atas kena sakit tu.

“Tang, tu ukai reti sida ke biak nadai penanggul kena sakit buah punggung tu,” ku iya.

“JKNS mega ngeripotka 65 peratus ari sida ti berubat ngena chara dialisis bisi sakit kemi manis.

“Tu ditangkan enggau sakit darah tinggi, kolestrol enggau obesiti,” ku iya.

Di Malaysia, penyampau kes sakit buah punggung dirikodka entara 7,000 ngagai 8,000 kes ninting taun.

Naka bulan Januari 2019, sepenyampau 40,000 orang ti sakit punggung benung berubat rawatan dialisis.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak