Projek Pan Borneo pemadu dikemerat KKR

PUNCAK BORNEO: Pemansang projek Pan Borneo di Sarawak endang pekara pemadu dikemerat Opis Menteri Kereja Raya (KKR).

Menteri Kereja Raya Baru Bian madah, laban ke nyadi Menteri ke megai tanggungpengawa, iya sigi naka ulih nentuka jalai digaga perintah besai digaga meruan.

Ku iya, nyema dibanding enggau jalai besai ba Kuala Lumpur enggau ba sitak Dun iya (Ba’Kelalan) jauh bebida laban agi nguna jalai batang.

Kenu ku iya, Menteri Besai Tun Dr Mahathir Mohamad udah ngemendarka agih RM1.2 billion dikena ngaga jalai Sarawak-Sabah Link Road.

Tandu iya, Jalai Dato Mohd Musa di Kota Samarahan deka dikemanah ngena agih RM234 juta seriris enggau pekara ti dikemerat opis menteri iya.

“Kitai patut ngetu bejaku enggau bepolitik tang fokus ngereja pengawa.

“Fokus ngagai pemansang ungkup rayat enggau pengelantang rayat,” ku iya.

Iya madah munyi nya rambau pengerami ketuai begulai enggau rayat di Kampung Bratan kena Hari Lima ke udah.

Kelimpah nya, Baru madah isu-isu sekula repuk enggau projek sepital ke tejanggal mega deka diputar lengkas.

Ku Baru projek ngaga sepital ba Kuching, Sri Aman enggau Lawas
deka diperati enggau berat.

“Kitai deka mansik enggau bejalaika ubah ke pemaik rayat ti udah kelalu lama nganti,” ku iya.

TEPA…Kaban Parlimen Puncak Borneo Willie Monggin (kiba) nyuaka tepa ngagai Menteri Kereja Raya Baru Bian kelai basa udah ngulu pengerami ba Kampung Bratan apin lama ke udah.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak