Putar lengkas isu meli lada

MIRI: Parti Bansa Dayak Sarawak Baru (PBDSB) ngelalau perintah Pakatan Harapan (PH) anang ngelaungka nasip pekebun enggau padagang lada kelebih agi bansa Dayak ba menua pesisir.

Presiden PBDSB Bobby William madah pengawa Kaunsil Lada Malaysia (LLM) ti ngetu sementara meli lada ari pekebun enggau pedagang meri pangka ngagai penatai pemisi sida.

“Nama kebuah ngetuka atur meli lada enggau nadai kebuah ti nyemetak?

“Taja sekat tu dipejalaika, mensia mayuh endang nemu mayuh agi pedagang enggau pekebun lada di menua pesisir endang bansa Dayak lalu pengidup sida bepanggai ngagai nya,” ku iya.
Bobby bejaku nya ba siti penerang media ditu, kemari.

Kelimpah ari nya, iya madah ungkus pengidup ba baruh PH patut meri penyenang ngagai rayat baka ti didanji sida sebedau Pengawa Bepilih Besai (PRU) nyin kemari.

“Taja pia, pengudah setaun mayuh dagang baka buah sawit labuh lalu diatu lada pan baka nya ditambah enggau ekonomi menua ti enda manah,” ku iya.

Bobby kala gawa enggau LLM pengelama 17 taun ari 1990 ngagai 2007 madah pengawa tu bedau kala nyadi nyata bendar mantaika LLM nadai pintar bejalaika pengawa mantu orang bekebun lada kelebih agi di Sarawak ti majoriti bansa Dayak.

“LLM ti betuaika Larry Sang nadai bisi atur ti nyemetak mantu bala sida ti bedagang lada chelum di menua pesisir.

“Aku ngarapka perintah berundingka inisiatif mutarka penanggul tu laban sida ti bekebun enggau bedagang lada endang ngarapka bisi jalai pemujur digaga lengkas,” ku iya.

Putar lengkas isu meli lada
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak