KUALA LUMPUR: Naka diatu bisi 157 sepital mungkur 137 sepital perintah enggau 20 sepital peribit diaku Sepital Bakih Anak Mi, ku Menteri Pengerai Datuk Seri Dr Dzulkefly Ahmad.

Ku iya, kelimpah ari sepital, 670 klinik pengerai mega diaku nyadi Klinik Bakih Anak Mit di selampur menua enggau tuju nempa Malaysia nyadi sebuah menua ti ‘Siruka Anak Mit’.

Iya mansutka jaku tu nengah sebengkah penerang berita beserimbai enggau ngintu Minggu Nusu Susu Indai Sedunya 2019, tadi.

“Opis Menteri Pengerai (KKM) nengah Perambu Atur Pemakai Nasional Malaysia III (2016-2025) ngerintai bemacham strategi ngemujurka program nusu susu indai.

“Entara strategi tu ngenegapka pejalai Inisiatif Sepital Bakih Anak Mit, Klinik Bakih Anak Mit enggau Tata Etika Makit Pemakai Anak Mit sereta produk bekaul.

DR DZULKEFLY

“Tu nyengkaum advokasyen pemakai, latih ungkup raban ngintu pengerai enggau ngerembaika penerang nengah media rama,” ku iya nerang silik.

Minggu Nusu Susu Indai Sedunya diintu ninting taun berengkah ari 1 nyentuk 7 Ogos di selampur dunya enggau tuju ngayanka pengeran kitai nerenak, meransang enggau nyukung nusu susu indai, ku Dr Dzulkefly.

Ku iya, berambaika jaku ‘Caknakan Ibubapa, Jayakan Penyusuan – Bertindak sekarang demi masa depan’ diintu datai ba taun Ke-27 ti ngemeratka pemesai pengawa mayuh bengkah raban.

Pekara tu beguna amat dikena nempa rentayan sukung nyendiaka rampa ti ulih ngenegapka indai nusuka anak sida enggau meruan.

Dr Dzulkefly mega ngerintaika sekeda lalau entara iya sida ti deka nyadi apai indai patut belajarka penemu pemun nusuka anak berengkah ari bisi tubuh.

Laki tauka sida sebilik mega patut nemu pasal pekara ti diguna indai dalam timpuh nusuka anak seraya pengaji patut nyendiaka rampa kereja ti lantang nyengkaum palan ngibun anak mit sereta bilik nusu.

Bala bukai patut bekunsika peneleba diri nusuka anak ngambika seruran meransang indai nusuka anak sida.